Meditsina qyzmetkerleri kúni qarsańynda Densaýlyq saqtaý ministri Aleksei Tsoi áriptesterin kásibi merekelerimen quttyqtap, olarǵa qazaqstandyqtardyń densaýlyǵyn qorǵaýda baǵa jetpes úles qosqandary úshin shynaiy alǵysyn jetkizdi, dep habarlaidy "Ult aqparat".
«Qurmetti dárigerler, medbikeler, feldsherler, qymbatty áriptester! Sizderdi kásibi merekelerińizben quttyqtaýǵa ruqsat etińizder! Sizderdiń árqaisylaryńyz júrek qalaýymen taǵdyrlaryńyzdy osynaý tereń bilimdi, tek qana eńbeksúigishtikti, jan-tánimen berilgendikti, eń bastysy meiirimdilik, baýyrmaldyq jáne izgilikti talap etetin osynaý qaiyrymdy mamandyqpen bailanystyrdyńyzdar. Meditsina qyzmeterleri – bul elimizdiń strategiialyq resýrsy. Búginde Qazaqstanda shamamen 260 myń meditsina mamany, onyń ishinde 75 myńnan astam dáriger, 185 myń orta meditsina qyzmetkeri eńbek etedi. Elimizde kún saiyn 2 myńnan astam ota jasalyp, bir myńnan astam sábi dúniege keledi. Emhanalarda 420 myńnan astam adamǵa qyzmet kórsetiledi jáne 18 myńnan astam jedel járdem kómegi shaqyrylady», - dedi ministr.
Onyń atap ótýinshe, osy jyldardyń ishinde elimizdiń densaýlyq saqtaý salasy qarqyndy damyp, joǵary tehnologiialyq kómek kórsetý kólemi artyp keledi. Jańa perinataldy ortalyqtar salyndy, innovatsiialyq ázirlemeler engizilip jatyr. Sonyń arqasynda biraz ýaqyt búryn múmkin emes kóringen sirek kezdesetin kúrdeli aýrýlar sátti diagnostikalanyp, emdelip jatyr.
«Sońǵy jyldary eki eń mańyzdy kórsetkishtiń jaqsarǵany baiqalady: ómir súrý uzaqtyǵy ulǵaidy jáne týý artty. Bul jetistikterdiń tasasynda árine, sizderdiń, óz isine jaýapkershilikpen qaraityn túrli mamandyq ieseleri densaýlyq saqtaý qyzmetkerleriniń zor eńbegi jatyr», - dedi Aleksei Tsoi.
