Densaýlyq saqtaý ministri Aleksei Tsoi koronaviýrspen kúreske atsalysqan dárigerlerdiń der kezinde almaǵan ústemeaqysy qalai tólenetinin túsindirdi, dep habarlaidy QazAqparat.
Ministrdiń aitýynsha, ústemeaqydan qaǵylǵan mamandardyń qujaty óńirlik komissiialar jumys istep turǵan kezde qaralyp úlgermei qalǵan.
Biraq ony keiin qozǵap, tiesili aqshany alýǵa múmkindik bar.
«Sol kezde arnaiy normalar kúshinde boldy. Árbir ákimdiktiń janynda óńirlik keńester jumys istegen bolatyn. Ony ákimniń orynbasarlary basqardy. Quramyna azamattyq qoǵam ókilderinen bastap túrli mamandar kirdi. Sondai tártip kúshinde bolǵan kezde berilip, qaralǵan ótinishterdiń bárine tiisti jaýap berildi. Oń sheshim shyǵarylǵandar boiynsha ústemeaqy bárine berildi», - deidivedomstvo basshysy.
Onyń sózine qaraǵanda, dárigerlerdiń bul máselesin jergilikti ákimdikter sheshýi tiis. Nemese quqyqtyq jolmen, sottasyp sheshýge bolady.
«Osyndai jaittar týyndap jasta, quqyqtyq tártippen sheshilýi kerek. Jergilikti ákimdiktiń nemese kásipodaqtardyń esebinen ótep berý tetikteri de bar. Iaǵni, bul másele de sheshilip jatyr. Ákimdikter osyndai másele týyndap jasta, óz qarajaty esebinen nemese qoǵamdyq qorlar arqyly ótep otyr», - degen ministr biyl densaýlyq saqtaý salasyna bólingen qarajat byltyrǵydan 200 mlrd teńgege kóp ekenin eske saldy.
«Byltyr 1 trln 662 mln 991 myń teńge bolsa, 2021 jylǵa biz 1 trln 862 mln 672 myń teńge qarjylandyrý aldyq. Iaǵni 200 mlrd teńgedei kóp bólinip otyr. Onyń bir bóligi koronavirýstan emdeý jáne qaýipti aimaqtarda rejimdik jaǵdaida jumys istep júrgen meditsina qyzmetkerlerine ústemeaqy tóleýge baǵyttaldy», - dedi Aleksei Tsoi.
