Búgin aýyr atletikadan Qazaqstan ulttyq quramasynyń bas bapkeri 1 kúmis, bir altyn alǵan soń jýrnalisterge aǵynan jarylyp áńgimesin aitty.
Keshe, ol tilshilerge bergen suhbatynda bir altyn, bir kúmis alatynyn aitqan edi. Sol kezde tań qalyp, tańdai qaqqan bolatynbyz. Aitqany aidai keldi. Altyndy da aldy, kúmisti de aldy. biraq, ýádesin oryndap, aitqanyna jetse de, Jaziraǵa ishtei ókpeli ekenin de jetkizdi.
- Men Nijatqa bas iem. Nege? Ol jeńiske jetetin salmaqty kóterýge daiyn ekenin aitty. Maǵan keregi osy edi. Nijat 214 kelini jattyǵý barysynda kóterip kórgen emes. Ol - búgin naǵyz jaýynger boldy. Týma talant ári asa qairatty da jigerli ekenin kórsetti, dáleldedi de. Bárin túsindi, aqyl tarazysyna saldy, táýekelge bardy.
- Osy erligi úshin qatty razy bolǵan boldyńyz ǵoi...
- Árine, budan artyq qandai erlik kerek edi? Osy qasieti úshin oǵan sheksiz razymyn. Qytailyqtar altyn bizdiń qolda, endi oǵan talasýǵa eshkimniń shamasy kelmeidi dep arqasyn keńge salyp turǵanda, Nijat nar táýekelge baryp, onyń aýyzyndaǵysyn jyryp ketti. Mundai jaǵdaidy eshkim kútken joq. Al, Jaziraǵa ishtei qatty renjip qaldym.
- Nege?
- Jalpy, men aryq aityp , semiz shyǵatyn adammyn. Búgingi josparlaǵanym eki altyn bolatyn. Jaziradan negizi altyn kútkenmin. Altyn alatyn qyz edi. Nijat ta, ol da serpe kóterýden óte myqty. Rasyn aitsam, kim serpe kóterýden myqty, sol jeńimpaz bolatyn edi. Jazira julqa kóterýde 117 kelini alǵanda áńgime basqasha bolar edi. Ol jattyǵýda julqa kóterýden 120 keli, serpe kóterýden 150- 153 kelini erkin alyp júrgen qyz bolatyn. Altyn alaryna sendim.
- Kúmiste jaman emes qoi. Bul renjitin dúnie me? Qazaq eli soǵan da shúkirlik etip, qýanyp jatyr...
- Bul sporttyń tilin mendei eshkim bile de, túsine de qoimas. Onyń alǵashqy jattyǵýda kúmis alǵany býynyna túsip ketti. Ziltemirdi súigende-aq túsindim. Súimeýi kerek edi. Meniń ishtei renjigenim osy. Jazira qytailyqtan basym túse almaimyn, osy jetedi dep oilap qaldy. Qansha qairasam da ol óziniń qalpyna kele almady. Serpe kóterýde oinap alyp júrgen salmaǵynan múlt ketti. Kóńilimde bir ǵana jubanysh bar. Ol qazaq qyzynyń tuńǵysh ret Olimpiada oiyndarynyń júldesine ie bolǵandyǵy. Men bul oqiǵany ishtei armandap júrgenmin. Sol ǵana meni jubatty. Áitpegende Jazirany keshirmes edim
Kúnsultan Otarbai, QazAqparat
