بٷگٸن اۋىر اتلەتيكادان قازاقستان ۇلتتىق قۇراماسىنىڭ باس باپكەرٸ 1 كٷمٸس, بٸر التىن العان سوڭ جۋرناليستەرگە اعىنان جارىلىپ ەڭگٸمەسٸن ايتتى.
كەشە, ول تٸلشٸلەرگە بەرگەن سۇحباتىندا بٸر التىن, بٸر كٷمٸس الاتىنىن ايتقان ەدٸ. سول كەزدە تاڭ قالىپ, تاڭداي قاققان بولاتىنبىز. ايتقانى ايداي كەلدٸ. التىندى دا الدى, كٷمٸستٸ دە الدى. بٸراق, ۋەدەسٸن ورىنداپ, ايتقانىنا جەتسە دە, جازيراعا ٸشتەي ٶكپەلٸ ەكەنٸن دە جەتكٸزدٸ.
- مەن نيجاتقا باس يەم. نەگە? ول جەڭٸسكە جەتەتٸن سالماقتى كٶتەرۋگە دايىن ەكەنٸن ايتتى. ماعان كەرەگٸ وسى ەدٸ. نيجات 214 كەلٸنٸ جاتتىعۋ بارىسىندا كٶتەرٸپ كٶرگەن ەمەس. ول - بٷگٸن ناعىز جاۋىنگەر بولدى. تۋما تالانت ەرٸ اسا قايراتتى دا جٸگەرلٸ ەكەنٸن كٶرسەتتٸ, دەلەلدەدٸ دە. بەرٸن تٷسٸندٸ, اقىل تارازىسىنا سالدى, تەۋەكەلگە باردى.
- وسى ەرلٸگٸ ٷشٸن قاتتى رازى بولعان بولدىڭىز عوي...
- ەرينە, بۇدان ارتىق قانداي ەرلٸك كەرەك ەدٸ? وسى قاسيەتٸ ٷشٸن وعان شەكسٸز رازىمىن. قىتايلىقتار التىن بٸزدٸڭ قولدا, ەندٸ وعان تالاسۋعا ەشكٸمنٸڭ شاماسى كەلمەيدٸ دەپ ارقاسىن كەڭگە سالىپ تۇرعاندا, نيجات نار تەۋەكەلگە بارىپ, ونىڭ اۋىزىنداعىسىن جىرىپ كەتتٸ. مۇنداي جاعدايدى ەشكٸم كٷتكەن جوق. ال, جازيراعا ٸشتەي قاتتى رەنجٸپ قالدىم.
- نەگە?
- جالپى, مەن ارىق ايتىپ , سەمٸز شىعاتىن اداممىن. بٷگٸنگٸ جوسپارلاعانىم ەكٸ التىن بولاتىن. جازيرادان نەگٸزٸ التىن كٷتكەنمٸن. التىن الاتىن قىز ەدٸ. نيجات تا, ول دا سەرپە كٶتەرۋدەن ٶتە مىقتى. راسىن ايتسام, كٸم سەرپە كٶتەرۋدەن مىقتى, سول جەڭٸمپاز بولاتىن ەدٸ. جازيرا جۇلقا كٶتەرۋدە 117 كەلٸنٸ العاندا ەڭگٸمە باسقاشا بولار ەدٸ. ول جاتتىعۋدا جۇلقا كٶتەرۋدەن 120 كەلٸ, سەرپە كٶتەرۋدەن 150- 153 كەلٸنٸ ەركٸن الىپ جٷرگەن قىز بولاتىن. التىن الارىنا سەندٸم.
- كٷمٸستە جامان ەمەس قوي. بۇل رەنجيتٸن دٷنيە مە? قازاق ەلٸ سوعان دا شٷكٸرلٸك ەتٸپ, قۋانىپ جاتىر...
- بۇل سپورتتىڭ تٸلٸن مەندەي ەشكٸم بٸلە دە, تٷسٸنە دە قويماس. ونىڭ العاشقى جاتتىعۋدا كٷمٸس العانى بۋىنىنا تٷسٸپ كەتتٸ. زٸلتەمٸردٸ سٷيگەندە-اق تٷسٸندٸم. سٷيمەۋٸ كەرەك ەدٸ. مەنٸڭ ٸشتەي رەنجٸگەنٸم وسى. جازيرا قىتايلىقتان باسىم تٷسە المايمىن, وسى جەتەدٸ دەپ ويلاپ قالدى. قانشا قايراسام دا ول ٶزٸنٸڭ قالپىنا كەلە المادى. سەرپە كٶتەرۋدە ويناپ الىپ جٷرگەن سالماعىنان مٷلت كەتتٸ. كٶڭٸلٸمدە بٸر عانا جۇبانىش بار. ول قازاق قىزىنىڭ تۇڭعىش رەت وليمپيادا ويىندارىنىڭ جٷلدەسٸنە يە بولعاندىعى. مەن بۇل وقيعانى ٸشتەي ارمانداپ جٷرگەنمٸن. سول عانا مەنٸ جۇباتتى. ەيتپەگەندە جازيرانى كەشٸرمەس ەدٸم
كٷنسۇلتان وتارباي, قازاقپارات
