Qazaqstan Respýblikasy Ishki ister ministriniń orynbasary Aleksei Kalaichidi qazaqstandyq politsiianyń qyzmettik modelge kóshý tujyrymdamasy týraly aitty, dep habarlaidy QazAqparat.
«Memleket basshysy jergilikti politsiia qyzmeti reformasynyń parametrlerin aiqyndap berdi. Atap aitar bolsam, kezeń-kezeńmen qol jetimdilikti qamtamasyz etý jáne politsiia qyzmetiniń servistik modelin qurý. Bul modernizatsiiadaǵy sheshýshi ról ýchaskelik inspektorǵa júkteldi», - dedi Aleksei Kalaichidi «Qazaqstandaǵy quqyq qorǵaý jáne sot júiesin jańǵyrtýdyń ózekti máseleleri» atty halyqaralyq dóńgelek ústel barysynda.
Ol óz baiandamysynda álemdik tájiribede qyzmet modeli qaýipsizdik máselelerin sheshýge negizdelgen politsiia jumysynyń ideologiiasy retinde qalyptasatynyn atap ótti.
«Politsiia qyzmetin uiymdastyrýdyń dástúrli jáne qyzmettik tásilderiniń negizgi aiyrmashylyqtary kelesidei: Dástúrli modelde politsiianyń basymdyǵy - qylmysqa qarsy kúres. Politsiianyń nazary quqyq buzýshylarǵa aýdarylady, al quqyqtyq statistika baǵalaý kriteriii retinde qoldanylady. Politsiia negizinde azamattar qylmystyń qurbany bolǵan kezde ózara árekettesedi. Iaǵni, quqyq buzýshylyqtyń aldyn alý jáne qaýipsizdik problemalaryn sheshý joldaryn ázirleý protsesine turǵyndar az qatysady», - dedi ishki ister ministriniń orynbasary.
Spikerdiń aitýynsha, politsiianyń qyzmet kórsetý modelin engizý, halyqtyń politsiiaǵa degen senimin arttyrýǵa múmkindik beredi.
«Birinshiden, bul qylmystyń aldyn alý salasyndaǵy tolyqqandy quqyqtyq óris. Aldyn alýdyń sýbektileri men olardyń quzyretin, profilaktikalyq jumystardy júrgizý quraldary men negizderin, sondai-aq oǵan qatysty obektilerdi anyqtaityn zańdar qabyldandy. Jergilikti politsiia qyzmeti quryldy, onyń negizin ýchaskelik inspektorlar (6481), patrýldik politsiia (10743), iývenaldy politsiia (2900) jáne turmystyq zorlyq-zombylyqtan qorǵaý bólimsheleri qurady (119)», - dedi Aleksei Kalaichidi.
Sonymen qatar, ol qoǵammen ózara árekettesý negizderi qalyptasqanyn atap ótti. Ishki ister organdarynyń qyzmeti boiynsha qoǵamdyq keńes quryldy, ol toqsan saiyn quqyq qorǵaý salasyndaǵy ózekti máselelerdi qaraidy. Ishki ister organdarynyń barlyq is-sharalary resmi saitta jáne Polisia.kz portalynda qamtylǵan.
«Azamattar ishki ister ministriniń blogyna tikelei habarlasý múmkindigin aldy. Politsiiaǵa júginý protsedýrasyn jeńildetý maqsatynda azamattar úshin 252 qabyldaý bólimi ashyldy. Ai saiyn «Jolda qabyldaý» aktsiiasy uiymdastyrlady. Áleýmettik jelilerdegi jumys kúsheitildi», - dedi vitse-ministr.
Onyń aitýynsha, ýchaskelik politsiia qyzmetkerleriniń sany 5 890-dan 6 481 adamǵa deiin kóbeidi. Atalǵan qyzmettiń materialdyq-tehnikalyq bazasy jetildirilýde. 250-den astam ýchaskelik politsiia beketteri salyndy. Ýchaskelik inspektorlardyń 70% -y kólikpen jáne planshettermen qamtamasyz etildi. 2019 jyly jalaqy 25% -ǵa kóterildi. Aldaǵy úsh jylda jalaqy taǵy 30% ósedi»,- dedi spiker.
Ministrdiń orynbasary jergilikti politsiia qyzmetin reformalaý strategiiasynyń ush baǵytyn atady:
– Qoǵamdyq seriktestik.
– Qoljetimdilik.
– Ýchaskelik politsiianyń róli.
«Árbir baǵyttyń júieliligi men pysyqtalý sapasyn qamtamasyz etý úshin bul jumysty úsh kezeńde ótkizý usynylady. Biz ákimshilik óndiris protsesterin, modýldik politsiia beketterin ornalastyrýdy qolǵa alamyz. Biz politsiia qyzmetiniń modelin qalyptastyrý úshin «pilottyq» aimaqtardy anyqtaimyz jáne tiptik jobalyq qujattamany ázirleimiz», - dedi spiker.
