Qazgidromet aldaǵy úsh kúnge aýa raiy boljamyn usyndy, dep habarlaidy "Ult aqparat".
"Reseidiń eýropalyq bóliginiń soltústik aýdany men Batys Sibir arqyly birinen soń biri yǵysqan atlantikalyq tsiklondardyń yqpalynan respýblikanyń soltústik jartysynda aýa raiy jańbyrly, salqyn boldy. Ońtústik oblystardaǵy jaýyn-shashynsyz ystyq aýa-raiy joǵary atmosferalyq qysym órisine bailanysty boldy. Aldaǵy úsh táýlikte atmosferalyq protsester qaita ózgerip, Qazaqstanǵa Batys Sibirdiń soltústik aýdandarynan salqyn jáne ylǵaldy aýa kele bastaidy. Sondyqtan respýblikanyń soltústik oblystarynda aýa temperatýrasy tómendep, naizaǵaily jańbyr jáne kúshti soltústik-batys jeli boljanady", — dep habarlaidy sinoptikter.
Respýblikanyń ońtústik oblystarynda 23 maýsymǵa qarai ystyq báseńdep, aýa temperatýrasy 33-38 gradýstan 28-35 gradýsqa deiin tómendeidi.
