Aldaǵy 4 jylda «Aýyl – el besigi» jobasy aiasynda 3,5 myń aýyldy damytýǵa 670 mlrd teńge jumsalady. Bul týraly Úkimet otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Kelesi 4 jyl ishinde 1,3 trln teńge bólinedi. Onyń ishinde «Aýyl - el besigi» aiasynda – 670 mlrd teńge. 2025 jylǵa deiin, damý áleýeti bar 3,5 myń aýyl qamtylady. Onda aýyl turǵyndarynyń 90 paiyzdan astamy turatyn bolady. Jalpy, aýyldyq jerlerdi damytý jónindegi keshendi tásil 2025 jyly aýyl turǵyndarynyń ómir súrý sapasy men ál-aýqatyn edáýir arttyrýǵa múmkindik beredi», - dedi Áset Erǵaliev atalǵan jobanyń oryndalýy jaiynda baiandai kele.
Onyń atap ótýinshe, atqarylǵan jumystardyń nátijesinde aýyl halqy sýmen jabdyqtaý qyzmetterimen 100 paiyz qamtylady. Joǵary jyldamdyqty internetke qoljetimdilik barlyq aýyl turǵyndary úshin qoljetimdi bolady. Aýyldyq jerlerde 24 mln sharshy metr turǵyn úi paidalanýǵa beriledi.
«Jergilikti mańyzy bar joldardyń 95 paiyzy jaqsy jaǵdaida bolady. 12 myń shaqyrym injenerlik jeliler salynady jáne jańǵyrtylady. 10 myń shaqyrym kent ishindegi joldar salynatyn jáne jóndeýmen qamtylady», - dedi ministr.
