Alaiaqtyq áreketi úshin ustalǵan Timýr Aidarbekov belgili rejisser Emir Baiǵazinniń «Úndestik sabaqtary» filminde basty róldi somdaǵan, dep habarlaidy QazAqparat tilshisi.
Aita ketsek, budan buryn 21 jastaǵy Timýr Aidarbekovtiń ustalǵany týraly jazǵan edik.
Ol oqýshylardy aldaǵany úshin isti boldy. Bir jaǵdaida ol video júktep alamyn degen jeleýmen 15 jastaǵy oqýshydan noýtbýk alyp shyǵýyn suraǵan. Osylaisha balany aldap dúkenge kirip ketip, dúkenniń arǵy esiginen shyǵyp ketken. Noýtbýkty 15 myń teńgege satyp jibergen. Taǵy birde qyz balanyń telefonyn aldap alyp ketken.
Jas akter balalar úiinde ósken. Balanyń boiyndaǵy talantty arthaýs janrynyń rejisseri Emir Baiǵazin baiqaǵan.
13 jasynda Timýr Aidarbekov «Úndestik sabaqtary», odan keiinirek «Jaraly perishte» filmderinde oinaǵan.
Eki kinotýyndynyń ekeýi de kóptegen álemdik kinofestivalderde top jardy.
Jas akter 2013 jyly Frantsiianyń Amen qalasynda ótken 33-halyqaralyq kinofestivalde eń úzdik erler róli úshin marapat alǵan.
Emir Baiǵazinmen birge qyzmet isteitin qoiýshy-sýretshi Sergei Kopylov eki kartinaǵa da rejisser ómirdiń qiyndyǵyn kórgen jastardy izdegenin aitty.
Olar Timýr Aidarbekovty balalar úiinen tapqan.
«Úndestik sabaqtaryn» túsirgen kezde men Baiǵazinmen jumys jasamadym. Men «Jaraly perishte», «Juldyzdarǵa qaraǵyńyz kele me?» kinolarynda birge boldym. «Jaraly perishtede» Timýr toksikomandy oinaidy. Men onyń taǵdyry qiyn dep estigenmin. Internatta ósken. Ol óte pysyq bala. Túsirilim jumystary bitken soń da 2 aptadai jaryqtandyrýshy bolyp jumys istedi. Sosyn ol joǵalyp ketti. 2017 jyly «Juldyzdarǵa qaraǵyńyz kele me?» filmine túsirý úshin shaqyrdyq. Aldyn ala túsirilimderge kelip júrdi. Keiin taǵy joǵalyp ketti. Bilýimshe, ol internatta burynnan beri turmaidy», - dedi Sergei Kopylov.
2014 jyly 17 jastaǵy Timýr Aidarbekov internattan qashyp ketpek bolǵan. Birneshe ret qashýǵa tyrysqany úshin tárbiesi qiyn balalardy beiimdeý ortalyǵyna tústi.
«Ol «Jaraly perishtede» túsip júrgende qashyp ketken. Ony Tarazdan taýyp aldy. Minezi óte qiyn bala. Tárbiege kónbeitin. Betine tatý jasaǵany jaily estidim. Qolynyń jymsymasy baryn burynnan bilemiz. Sodan qaityp ákelmedi. «Qazaqfilmde» de bireýdiń telefonyn surai turyp, sol beti qaitarmady. Onyń akterlik potentsialy myqty bolatyn. Biraq, aiaq astynan joǵalyp ketetin adammen jumys isteý múmkin emes», - dedi ol.
Aita ketý kerek, Qazaqstannyń eń ataqty filmi «Úndestik sabaqtary» halyqaralyq kinofestivalderden 1 jylda 30-ǵa jýyq júlde alǵan. Film qazaq kinosynda tuńǵysh ret eń joǵarǵy «A» sanatyndaǵy Berlin kinofestivaliniń baiqaý baǵdarlamasyna qatysyp qana qoimai, odan «Kúmis aiý» júldesin oljalaǵan. Bul filmniń prokaty Qazaqstanda 5 jeltoqsanda bastaldy.
