Foto: almaty.tv
Áleýmettik jelide janarmai kartalary satylatyny jóninde habarlandyrýlar tarap jatyr. Kartany belgilengen baǵamen satyp alǵannan keiin, janarmai quiý stantsiiasynda aqsha tóleýdiń qajeti joq delinedi. Aqparatty Stopfake.kz tekserip kórdi, dep habarlaidy QazAqparat.
«Qoldanysta joq janarmai kartalary alǵash ret 2021 jyly Reseide satyla bastady. Alaiaqtar kartalardy arnaiy ázirlengen sait arqyly satqan, al sengish kólik júrgizýshileri aqshany olardyń shotyna aýdaryp otyrǵan», - delingen saitta.
Anyqtalǵandai, Qazaqstanda alaiaqtyq shemasy sál basqasha.
«Avtokólik júrgizýshilerine Helios, Qazaq Oil jáne «Gazprom» kompaniialarynyń janarmai kartalary usynylady. Satylym Telegram arqyly Qostanaida rasymen de jumys istep turǵan kompaniia atynan jasalyp jatyr. Alaida, ashyq derekterge súiensek, atalǵan firma órt sóndirgish quraldardy toltyrýmen ainalysady jáne janarmai saýdasyna eshqandai qatysy joq. Sonymen qatar, 2Gis qyzmetinde janarmai kartalaryn alý úshin kompaniianyń keńsesine habarlasyp, ol jerden eshkimdi tappaǵan adamdardyń pikirleri jazylǵan. Aita keteiik, Helios, Qazaq Oil jáne «Gazprom» resmi portaldarynda janarmai kartalaryn deldaldar arqyly satý týraly eshteńe aitylmaǵan.
Qazaq Oil kartalardy kompaniiamen shart jasasqannan keiin resmi satý ortalyqtarynda 500 teńgege satyp alýdy usynady. Al Helios kompaniiasynyń saitynda janarmai kartalary týraly aqparat múldem joq. Onyń ornyna klientterge arnaiy bonýstyq kartalardy rásimdeý usynylady. «Gazprom» kompaniiasynda korporativtik klientterge arnalǵan janarmai kartalary bar. Ony kompaniiamen resmi kelisimshart jasasqannan keiin ǵana satyp alýǵa bolady. Qoryta aitqanda, janarmai kartalaryn satý jarnamasy – alaiaqtardyń isi. Kompaniialardyń janarmai kartalary resmi bólimderde satylady jáne olardy resmi kelisimshart jasalǵannan keiin ǵana satyp alýǵa bolady. Qaznette kartalary satylyp jatqan kompaniia múldem basqa qyzmetpen ainalysady, jáne onyń kartalar satýǵa eshqandai qatysy joq», - dep qorytyndylaidy Stopfake.kz.
