Foto: instagram.com/rsk_almobl
Almaty oblysy Jetigen aýyldyq okrýgine qarasty 4 aýyldyq eldi meken Alataý qalasynyń quramyna engiziledi. Sondai-aq Jetigen aýylynyń esimi «Alataý» bolyp ózgerýine bailanysty eshqandai másele bolmaidy. Bul týraly Almaty oblysy Jetigen aýyldyq okrýginiń ákimi Nurlan Ábilev aitty, dep habarlaidy Kazinform agenttigi.
Aýyl ákiminiń aitýynsha, búgingi Jetigen aýyldyq okrýginde 4 aýyldyq eldi meken bar: Jetigen, Quiǵan, Eńbek jáne Jańa arna aýyldary.
«Prezident Jarlyǵyna sáikes 4 aýyldyń barlyǵy Alataý qalasynyń quramyna kiretin bolady. Bul rette turǵyndardy eshqandai qiyndyqtar bolmaidy dep sendirgim keledi. Eldi mekenniń ataýy ózgerýine bailanysty da qiyndyqtar bolmaidy. Barlyǵy birtindep josparǵa sáikes iske asady. Memlekettik qyzmetter de burynǵydai kórsetile beredi. Sondai-aq aldaǵy ýaqytta Alataý qalasynyń quramyna basqa da aýyldar qosylatyn bolady. Jalpy, aldaǵy Alataý qalasynyń aýmaǵy 89 myń gektarǵa jetedi dep josparlanǵan», - dedi Nurlan Ábilov.
Alataý qalasynyń qurylýy oblys ekonomikasyna úlken úles qospaq.
«Endi jumys izdep qalaǵa sabylǵan jurttyń máselesi sheshildi desek bolady. Sizder bilesizder, munda Jetigen – Qorǵas temir joly bastalady. Bul temir jol jelisi sheteldermen bailanysty damytyp, el ekonomikasyn órkendetedi. Sondai-aq Almaty stansasyn ainalyp ótetin Jetigen-Qazybek bek temir jol jelisiniń qurylysy bastaldy. Sonymen qatar qalanyń bas josparyna sáikes kóptegen nysan salynyp, jumys oryndary ashylýy kerek. Prezident Jarlyǵy shyqqaly beri jergilikti halyq erekshe qýanyp, birin-biri quttyqtap jatyr», - dedi Jetigen aýyldyq okrýginiń ákimi Nurlan Ábilev.
Jetigen aýylynyń qoǵamdyq keńesiniń tóraiymy Qaniza Nuranova aýyldastaryn erekshe oqiǵamen quttyqtady.
«Biz keshe ǵana aýyl turǵyndary edik, al búgin aiaq astynan qalalyq bolyp shyǵa keldik. Bul ásirese men sekildi jasy úlken kisiler úshin erekshe oqiǵa. Bul – keremet jańalyq. Jańa qalanyń boi kóterýimen ekonomika qarqyndy túrde ósetin bolady. Investitsiia tartylyp, halyq úshin jańa jumys oryndary ashylady. Men aýyldastarymdy osy keremet oqiǵamen quttyqtaimyn», - dedi Qaniza Nuranova.
Mariia esimdi volonter Alataý qalasynyń qurylýynan tek jaqsylyq kútetinin aitty.
«Halyq bul jańalyqtan oń ózgerister kútedi. Endi jastar aýyldan ketpeidi dep oilaimyn. Qazir aýyl halqynyń 70 paiyzy qalaǵa baryp jumys istep júr. Sondyqtan munda eń aldymen jańa jumys oryndary ashylǵany durys. Jańa aýrýhanalar, mektepter, kolledj, institýttar salynsa bolsa tipti jaqsy», - dep atap ótti Mariia.
Buǵan deiin elimizde Alataý degen jańa qala paida bolǵanyn jazǵanbyz.
