Shyǵys Qazaqstan oblysynda koronavirýs pandemiiasyna bailanysty demalys oryndarynyń ieleri men týrister birqatar normativterdi saqtaý kerek, dep habarlaidy "Ult aqparat".
ShQO Aqparat ortalyǵynyń málimetinshe, demalýshylar jaǵajai aimaǵynda kem degende eki metr qashyqtyqty saqtaýy tiis. Demalys bazalaryndaǵy jatyn oryndar men úishikterdiń tek 50%-y jalǵa beriledi. Sondai-aq kelýshilerden sońǵy 7 kún ishinde alynǵan koronavirýs juqtyrmaǵandyǵy týraly anyqtama qaǵaz bolýy shart. Bir otbasynda 1 adamnyń anyqtamasy bolsa jetkilikti. Bul týraly oblystyń bas memlekettik sanitar dárigeriniń qaýlysynda aitylǵan.
Barlyq demalys oryndary dezinfektsiialyq jáne jeke qorǵanys quraldarymen, dene qyzýyn qashyqtan ólsheitin termometrlermen qamtylýy qajet. Demalýshylardyń ózderinde de jeke qorǵanys quraldary bolǵany abzal. Kelýshilerge meditsinalyq kómek kórsetý úshin Alakóldiń jaǵasynda Qabanbai aýylyndaǵy dárigerlik ambýlatoriiadan táýlik boiy jumys isteitin 12 tósek-oryn daiyndaldy. Sonymen qatar kóldiń boiyna 24 saǵattyq travmatologiia pýnkti ornatylǵan. Qajet bolǵan jaǵdaida mamandandyrylǵan meditsinalyq kómek kórsetý úshin Óskemen jáne Semei qalalarynan mamandar jetkiziledi. Patsientterdi Úrjar aýdanyndaǵy aýrýhana qabyldaýǵa daiyn. Onda eki ókpeni jasandy jeldetý apparaty bar.
