Ulttyq kitaphanyń «Qazaqstan kitaptary» oqý zalynda kórnekti ǵalym, uly oishyl Ábý Nasyr ál-Farabidiń 1150 jyldyǵyna arnalǵan ál-Farabi ǵylymi ortalyǵy ashyldy, dep habarlaidy QazAqparat tilshisi.
Sharaǵa belgili ǵalymdar, jazýshylar, memleket jáne qoǵam qairatkerleri, shet elderdiń Bas konsýldyqtarynyń ókilderi, JOO stýdentteri, kitaphana oqyrmandary jáne BAQ ókilderi qatysty.
Ál-Farabi ǵylymi ortalyǵynyń maqsaty – Shyǵystyń uly ustazy, filosof, erte ortaǵasyrlyq entsiklopedist-ǵalym Ábý Nasyr ál-Farabidiń rýhani jáne ǵylymi murasyn ulyqtaý, kópshilikke taratý.
Ǵylymi ortalyq kitaphana qorynan ál–Farabi shyǵarmalarynan jáne ol týraly materialdardan ashyq qoljetimdi kórme usynady. Onda ál-Farabidiń ómiri men shyǵarmashylyǵy týraly materialdar, filosoftyń eńbekteri jáne onyń álem halyqtarynyń túrli tilderine aýdarylǵan dúnieleri, belgili otandyq jáne sheteldik ǵalymdardyń, filosoftardyń, tarihshylardyń zertteýleri, elektrondyq basylymdar, merzimdi basylymdardan alynǵan qujattardyń derek qory, eńbekteriniń jinaǵy bar. Ortalyq qory únemi jańa basylymdarmen jáne materialdarmen tolyqtyrylatyn bolady.
«QR Ulttyq kitaphanasyndaǵy ál-Farabi ǵylymi ortalyǵy oishyldyń ǵylymi eńbekteriniń murasyn tereń zerdeleýge jáne kópshilik is-sharalardy ótkizýge múmkindik beredi. Sondai-aq, ortalyqta belgili farabitanýshy ǵalymdarmen, akademiktermen kezdesýler uiymdastyrý, taqyryptyq konkýrstar, ekskýrsiialar ótkizý, ál-Farabi týraly filmder kórsetý jáne t.b. is-sharalar ótkizýge jaǵdai jasalady», – deidi Ulttyq kitpahana direktory Baqytjamal Ospanova.
Shara barysynda qatysýshylar ál-Farabi eńbekterine keńinen toqtalyp, onyń ómirshendigin tilge tiek etti.
«Ál-Farabi Aristotelden keiingi dúnie júzi bilimi men mádenietiniń ekinshi ustazy atanǵan danyshpan, entsiklopedist ǵalym, astronomiia, astrologiia, matematika, logika, mýzyka, meditsina, tabiǵattaný, sotsiologiia, lingvistika, poeziia, ritorika, filosofiia ǵylymdaryn meńgerip, 200-ge jýyq traktattar jazǵan. Ál – Farabidi áli de zertteý qajet. Ol qupiiaǵa toly tulǵa», – dedi Ábsattar Derbisáli.
Qazaqstan ál-Farabidiń 1150 jyldyǵyn merekeleýdi resmi túrde 29 qańtar kúni bastady.
