Batys Qazaqstan oblysynyń Aqjaiyq aýdanynda bastyǵyn atyp óltirgen politseidiń aqyl-esi durys ekeni anyqtaldy. Mamandardyń pikirinshe, ol kisi óltirgen kezde fiziologiialyq affekt jaǵdaiynda bolǵan. Bul týraly arnaiy kúzet basqarmasynyń qyzmetkeri 24 jastaǵy Serik Ǵarif týraly sot-psihiatriialyq saraptama qorytyndysynda jazylǵan.
Serik Ǵarif biyl 6 qyrkúiekte tabeldik tapanshadan 34 jastaǵy basshysy Rústem Raqyshevqa Aqjaiyq aýdandyq ishki ister bólimi aldynda oq atty. Kisi óltirgen soń birden politsiiaǵa berilgen, dep habarlaidy sputniknews agenttigi jergilikti uralskweek.kz portalyna silteme jasap.
Sot-psihiatriialyq saraptama qorytyndysy boiynsha, Serik Ǵariftiń deni saý, aqyl-esi durys. Biraq kúdiktini tekserip shyqqan mamandardyń aitýynsha, ol uzaq ýaqyt qysym kórý saldarynan týyndaǵan fiziologiialyq affekt jaǵdaiynda qylmys jasaǵan.
Serik Ǵarif qylmysy týraly ózi tolyǵymen aityp berdi. Onyń sózine súiensek, Rústem Raqyshevpen jumys istegen alǵashqy kúnnen bastap, ekeýi bir-birin jaqtyrmaǵan.
"Maǵan únemi tiisip júretin. Qaita-qaita eskertý jasap, basqalardyń kózinshe tómendetetin. Eshqashan durystap amandaspai, únemi til tigizip júrdi. Osynyń bári birtindep jinala berdi. Sol kúni taǵy da meniń namysyma tidi. Sodan soń menimen basqa qyzmetkerlerge qarý alyp, jumysqa kirisýge buiyrdy. Qarý bólmesinen tapanshany alyp, shyǵa bergende, daladan Rústem Raqyshevty kórdim. Ádettegidei aiý siiaqty qorbańdap kele jatyr eken. Ony jek kóretinmin. Júris-turysy jynyma tietin. Artynda kele jatyp, tapanshamdy shyǵardym da, aiaǵynyń astyna oq attym. Sodan soń, ne kóringenin bilmeimin, qalai bolsa, solai oq jaýdyra berdim. Ol sulap túsken kezde ǵana toqtadym", — dep Serik Ǵarif saraptama kezinde jaýap bergen.
"Keri burylyp, kezekshiniń ústeline keldim de, tapanshany qoiyp: "Boldym" dedim. Basqa AIIB qyzmetkerleri júgirip kelip, qolymdy burady. Oqsaýyttaǵy qalǵan oq-dárini tartyp alyńdar dedim", — dep jalǵastyrdy eks-politsei.
Serik Ǵariftiń uzaq ýaqyt boiy kúizeliste júrgenin onyń aǵasy Saqaýov ta aitty. Kúdikti 2015 jyly kúzet qyzmetine jumysqa ornalasqaly beri Chapaev aýylyndaǵy sol aǵasynyń úiinde turǵan. Saqaýovtyń aitýynsha, Serik Ǵariftiń minezi tuiyq, jumysy týraly tis jarmaǵan.
2017 jyly bir kúni aǵasy baýyrynyń jumystan unjyrǵasy túsip kelgenin baiqap qalǵan. Túski as kezinde nege kóńil-kúii bolmai júrgenin suraǵan. Serik Ǵarif kenet jylap jiberip, qatty sharshaǵanyn, budan bylai mundai jaǵdaida jumys istei almaitynyn aitqan. Aǵasy ne bolǵanyn surai bastaǵanda Serik Ǵarif ústelden turyp, úiden shyǵyp ketip qalǵan. Sodan keiin onyń úiine eki kúnnen keiin kelgen jáne eshqashan jumysynda ne bolyp jatqanyn aitpaǵan.
Ulynyń minezi tuiyq ekenin kúdiktiniń ákesi Serik Ǵarif rastady.
"Onda ne bolǵanyn, qandai sebeppen óltirgenin bilmeimin. Ulymmen kezdesýge birneshe ret bardym. Ol janjaldyń sebebin aitpady. Anasymen júzdesýden bas tartyp, munda kelmeýin surady. Advokat jaldaýǵa tyiym saldy, oǵan áli kúnge deiin tegin, memlekettik advokat qyzmet kórsetýde", — deidi Nurlan Ǵarif.
Rústem Raqyshevtyń ata-anasy da janjaldyń sebebin bilmeidi. Marqumnyń ákesi Jasqairat Raqyshev sot- psihiatriialyq saraptamanyń qorytyndysymen kelispeidi.
"Serik Ǵarif ulymdy qasaqana óltirdi, eshqandai affekt bolǵan joq. Serik túsiniktemesinde pyshaq alyp júrgenin aitty. Iaǵni ol bul qylmysqa daiyndalǵan", — deidi ol.
Rústem Raqyshevtyń týystary kúdiktini qaita saraptamadan ótkizýdi talap etýde. Qujatta tergeýshi kóptegen protsessýaldyq quqyq buzýshylyq jibergen, al bul qujatty zańsyz dep tanýǵa negiz bola alatyn kórinedi.
Qazirgi tańda bul isti tergeý jalǵasyp jatyr.
