Batys Qazaqstan oblysynda kásibi sport klýbtarynyń biýdjetin qysqartý kózdelýde, dep habarlaidy "Ult aqparat".
BQO Dene shynyqtyrý jáne sport basqarmasynyń basshysy Qaimen Esendiiarovtyń Óńirlik kommýnikatsiialar qyzmeti alańynda ótken brifingide málim etkenindei, sonyń esebinen únemdelgen qarajatty balalar jáne jasóspirimder sportyn, buqaralyq sportty damytýǵa jumsaý qarastyrylýda.
Memleket basshysy halyqqa Joldaýynda «Qarjy jetispeýshiligi jaǵdaiynda kásibi sport klýbtaryn tolyqtai biýdjet qarajaty esebinen ustaýdyń mańyzdylyǵy joq», dep atap kórsetken bolatyn.
Oblysta qazirgi tańda úsh kásibi sport klýby bar: «Aqjaiyq» fýtbol klýby, «Aqjaiyq» dopty hokkei klýby jáne voleibol komandasy.
Q.Esendiiarovtiń sózine qaraǵanda, biyl «Aqjaiyq» fýtbol klýbyna 635 mln teńge bólindi. Indetke bailanysty birinshi liga komandalary arasyndaǵy Qazaqstan chempionaty tek kúzde ǵana, eki ai merzimde ótti. «Aqjaiyq» fýtbol klýby aldaǵy jyly Premer-ligaǵa qaita oralýdy maqsat etedi. Bas bapker de jańadan taǵaiyndalady.
«Aqjaiyq» fýtbol klýbynyń qosymsha qun salyǵyna qatysty 200 mln teńge qaryzy áli jabylǵan joq. Ony biýdjet esebinen jabý múmkin emes. Zańdy tulǵa óz mindettemelerin oryndai almasa, ony taratý nemese bankrot dep taný rásimderi júzege asyrylady. Qazirgi kezde basqarma bul máseleni zerdeleý ústinde. Árine, «Aqjaiyq» fýtbol klýby joiylyp ketpeidi. Memlekettik satyp alý zańnamasyna sáikes komandany konkýrs arqyly qarjylandyrý júrgiziledi. Bul rette, jastar jáne balalar fýtbolyna basa mán bermekshimiz», - dedi Qaimen Esendiiarov.
