Qazaqstandyq aqyn ári ánshi Maqpal Jumabai Ulybritaniia astanasy Londonda jeke kontsertin ótkizbek. Aldaǵy 18 qyrkúiekke josparlanǵan shyǵarmashylyq keshi týraly ánshiniń ózi aityp berdi, dep habarlaidy QazAqparat tilshisi.
«Bul jobaǵa daiyndalǵanyma týra bir jyl boldy. Jýyrda 15 adam Londonǵa attanǵaly otyrmyz. Zamanaýi qazaq óneri úshin táýekelge bel bailadyq. Birshama ýaqyt buryn bilimim men tájiribemdi zamanaýi ónerimizdi damytý jolyna arnaitynymdy, sol jolda naqty ister bastaǵanymdy jariialaǵan edim. Bul London sapary – sol naqty isimniń, táýekelimniń biri. 18 qyrkúiek Londondaǵy Brýnel keńistiginde (mýzeiinde) AUA kontseptýaldy kontsertim ótedi. Kontsertti indýstrialdyq revoliýtsiianyń tulǵalary Mark jáne Izambard Brýnelder 1842 jyly salǵan osy tarihi ǵimaratta ótkizgim keldi», - dedi ánshi M. Jumabai.
Mýzykanttyń aitýynsha, kontsertte aitylatyn barlyq jyrlar kásibi deńgeide aǵylshyn tiline aýdarylǵan.
«Kontsertpen qatar, Londonda «Maqpalsher» atty animatsiialyq qysqa metrli filmimizdi kórsetemiz. Keshte aitylatyn barlyq jyrlardy kásibi aýdarmashy aǵylshyn tiline aýdardy. Aýdarma kórsetiledi ári qonaqtarǵa kitapsha retinde tartý etiledi. Kúni keshe ǵana uiymdastyrý jumystarynyń barlyq kezeńine núkte qoidyq», - dedi ol.
Aqyn aǵylshyn elindegi óz shyǵarmashylyq keshin qazaq óneriniń shetelge shyǵýy, tanylýy dep sanaidy.
«Árine, Londonda kontsert berý álemdik jańashyldyq emes, degenmen men úshin, meniń shyǵarmashylyǵym úshin mańyzdy. Án keshimde barlyǵy 12 avtorlyq jyr oryndalady. Jyrlarym arqyly aǵylshyn tyńdarmandaryna qazaq halqynyń dúnietanymy men adamnyń ishki sezimin jetkizgim keledi. Meniń shyǵarmalarymda ómir, adami qundylyqtar men elene bermeitin názik sezimder baiandalady. Bir jaǵynan biz úshin syn bolaiyn dep tur, sebebi bizdiki standartty emes, jańa mýzykalyq baǵyt. Taǵy bir aityp ótetin jait, kontsert - kommertsiialyq emes, mádenietke, ónerge arnalǵan joba, sondyqtan ol tegin ótedi», - deidi óner iesi.
Ánshi málim etkendei, kontsert jandy daýysta ótedi jáne oǵan shamamen 120-150 kórermen keledi dep kútilýde.
