Halyq aldyndaǵy eseptik kezdesýinnen keiin BAQ ókilderiniń saýalyna jaýap bergen Indýstriia jáne infraqurylymdyq damý ministri Beibit Atamqulov aqyly joldar tarifi qymbattamaitynyn aitty, dep habarlaidy QazAqparat.
«Qazirgi tarifti Úkimet 2013 jyly bekitken bolatyn. Sodan beri birneshe devalvatsiia bolsa da, tarif ózgermedi. Qazirgi tarif kóliktiń barlyq túri úshin aitarlyqtai qolaily. 2013 jyldan beri aqyly ýchaskeler qoldanylyp keledi. Osyǵan deiin eshqandai shaǵym túsken joq. Osynyń bári óz kezinde «Atameken» UKP-nyń, salalyq qaýymdastyqtardyń, jol qozǵalysyna qatysýshylardyń maquldaýynan ótken», -dedi ministr BAQ ókiliniń suraǵyna bergen jaýabynda.
Vedomstvo basshysy ekinshi tehnikalyq sanattaǵy joldar tarifi júk kólikteri úshin jeńildetilgen kórsetkishpen esepteletinin qaitalap túsindirdi.
«Ekinshi sanattaǵy aqyly joldardyń tarifi tómendetilgen kórsetkishpen qabyldanady. Is júzinde ol 40 paiyz tómen bolady. Jeńil kólikter úshin «1 shaqyrymǵa - 1 teńge» tarifi ózgerissiz qalady. Al aýyr júk kólikteri úshin tarif koeffitsienti tómendeidi. Onyń mólsheri áli pysyqtalyp jatyr. Áli oǵan jetken de joqpyz. Ókinishke qarai, insaiderlik aqparat tarap ketip otyr. Onyń ózi tekserilmegen de, rastalamaǵan da. Áýeli júk kólik júrgizýshileriniń qulaǵyna jetip, keiin túrli chattarǵa taraǵan», -deidi Beibit Atamqulov.
Sondai-aq, ol tarif ózgeretin bolsa, áýeli ony ózge memlekettik organdar maquldaitynyn eskertti.
«Memlekettik organdar maquldap, tiisti agenttikter men «Atameken» oń baǵasyn beredi. Osydan keiin ǵana tarif ministrdiń jarlyǵymen bekitiledi. Oǵan áli jetken joqpyz ǵoi. Iaǵni, júk kólik ieleri máreden erte shyǵyp ketken. Olai isteýge bolmaidy. Tarifti ósirý baǵytynda ázirge eshqandai qozǵalys bolmaitynyna sendirgim keledi. Ekinshi tehnikalyq sanattaǵy joldardyń tarifin tómendetý bolady dep otyrmyz. Biraq mundai tarif mamyr aiynan bastap qana qarala bastaǵan», - dedi Beibit Atamqulov.
