Senattyń jalpy otyrysynda depýtat Aqylbek Kúrishbaev Úkimetti joǵary oqý oryndaryndaǵy tárbie jumystarynyń jai-kúiine nazar aýdarýǵa jáne bul baǵytty jańa sapaly deńgeige kóterýge shaqyrdy, dep habarlaidy QazAqparat.
Ol óziniń depýtattyq saýalynda jastar tárbiesine qatysty problemalar qoǵamda alańdaýshylyq týǵyzyp otyrǵanyn atap ótti.
«Bas prokýratýranyń málimeti boiynsha, elimizde jyl saiyn kolledjder men ýniversitetterdiń shamamen 1,5 myń stýdenti qylmystyq jaýapkershilikke tartylady. 2020 jyly 18-30 jas aralyǵyndaǵy 4 207 jas esirtki zattaryn paidalanǵany úshin esepke alyndy. Olardyń ishinde ýniversitetterde oqityndar az emes», – dedi Aqylbek Kúrishbaev Úkimet basshysynyń orynbasary Eraly Toǵjanovtyń atyna joldaǵan saýalynda.
Sondai-aq ol jastardyń ýniversitetterde kezdesetin problemalarǵa toqtaldy. Olar – psihologtardyń, teologtardyń, sport bazalarynyń jetispeýshiligi, adamgershilik-patriottyq tárbieniń álsizdigi, shyǵarmashylyq belsendi jastardy qoldaý men damytýǵa tiisti kóńil bólinbeýi. Depýtat buǵan kóptegen joǵary oqý oryndarynda tárbie jumystarynyń resmi sipatta ǵana júrgizilýi sebep ekenin aitty.
«Qazir ýniversitet basshylary stýdentterge «tárbielenýshi tulǵa» retinde emes, ýniversitetke «qarjy túsirýdiń kózi» dep tym jaidaq qaraidy. Anyǵyn aitsaq, kóptegen joǵary oqý oryndarynda kadrlardy daiyndaý qarapaiym bizneske ainalyp ketti. Tipti, ýniversitetterdi akkreditteý júiesinde stýdentterdiń tárbie jumysy qarastyrylmaǵan. Jalpy, bizdiń tárbie júiemiz ulttyq qundylyqtarymyzǵa negizdelýi kerek. Ókinishke qarai, sońǵy kezde, ásirese, halyqaralyq deńgeidegi ýniversitetterde batystyq ustanymdarǵa elikteý oryn alýda», – dedi senator.
Osyǵan bailanysty Aqylbek Kúrishbaev elimizdiń joǵary oqý oryndaryndaǵy tárbie jumysynyń jai-kúiine syni taldaý júrgizýdi jáne ony qoǵamdaǵy qazirgi zamanǵy úrdister men damý basymdyqtaryna sáikes sapaly jańa deńgeige kóterý úshin qajetti sharalar qabyldaýdy usyndy.
