Parlament Májilisinde «S. Seifýllin atyndaǵy Qazaq agrotehnikalyq ýniversiteti» AQ basqarma tóraǵasy Aqylbek Kúrishbaev veterinar mamandardy jumysqa ornalastyrý kezindegi kemshilikterdi atady, dep habarlaidy QazAqparat.
«Qazirgi kezde elimizde joǵary bilimdi aýyl sharýashylyǵy mamandaryn daiarlaýmen 20 JOO ainalysady. Onyń ishinde beiindi bolyp turǵan tek úsh agrarlyq oqý ornynda aýyl mamandarynyń 50 paiyzdan astamy daiarlanady. Al qalǵany beiindi emes 17 JOO-da daiyndalady. Veterinariia da meditsina sekildi kúrdeli ǵylym. Eger de biz biliktiligi joǵary veterinarlardy kórgimiz kelse, olardy daiarlaýdy tek beiindi oqý oryndarynda júzege asyrý kerek. Iaǵni, kadrlyq ári zerthanalyq bazasy bar JOO-lar ǵana mamandardy oqytýy tiis», - dedi A. Kúrishbaev veterinariialyq jáne fitosanitariialyq qaýipsizdik máselelerine arnalǵan dóńgelek ústel otyrysynda.
Osy oraida ol veterinar mamandyǵynyń mártebesin kóterip, damyǵan elderdegi sekildi olardyń eńbekaqysyn laiyqty deńgeige kóterý qajettigin aitty.
Sonymen qatar «Diplommen aýylǵa» baǵdarlamasy talaptarynyń oryndalýy jaiyna toqtalǵan A. Kúrishbaev, «ókinishke qarai, osy másele jergilikti atqarýshy organdardyń nazarynan tys qalyp otyr. Bul turǵyda bizdiń ýniversitettiń jaǵdaiy boiynsha mysal keltirgim keledi. Sońǵy 3 jylda bizde 300 veterinar aýyldy jerge jumysqa turýǵa bardy. Onyń ishinde tek jiyrmasy ǵana kóterme járdemaqyny aldy, sondai-aq eki adam baspana alýǵa jeńildikti nesiege qol jetkizdi. Iaǵni, tiisti zańnama oryndalmai jatyr», - dep atap ótti.
