QR Parlamenti Senatynyń depýtaty Aqylbek Kúrishbaev Úkimetke Aýyl sharýashylyǵy ministrliginiń ózge memorgandarǵa kiriptarlyǵy týraly depýtattyq saýal joldady, dep habarlaidy QazAqparat.
Senator QR Premer-Ministri Álihan Smaiylovtyń atyna joldaǵan depýtattyq saýalynda agrarlyq salany qarjylandyrýdaǵy poblemalardy kóterdi.
Onyń málimeti boiynsha, ótken 4 jylda agroónerkásip keshenin damytý jónindegi memlekettik baǵdarlamalardy iske asyrýǵa 2 mlrd teńge bólý josparlanǵan. Alaida is júzinde tek 1,6 mlrd teńge ǵana jumsalǵan. Senator aýyl sharýashylyǵy vedomstvosynyń ózge memlekettik organdarǵa kiriptarlyǵy keibir kezde shuǵyl sheshim qabyldap, áreket etýge kedergi keltiretindigin aitty.
«Bizde aýyl sharýashylyǵy ministriniń barlyq negizgi normativtik buiryqtary mindetti túrde basqa memlekettik organdarmen kelisiledi. 2020-2021 jyldary sýbsidiialaý qaǵidalaryn, reglamentterdi kelisýge 20-30 kúnnen jeti aiǵa deiin ýaqyt ketti. Bul jerde salany jedel basqarý týraly qalai aitýǵa bolady», - dedi senator.
Depýtat byltyrǵy qurǵaqshylyq agrobizneske qatty áser etkenin eske saldy. Al ónimderdi eksporttaýǵa tyiym salý jáne kvotalardy engizý sharýalardyń tabysyn shektep tastaǵan.
«Biyl kóptegen aýylsharýashylyq taýar óndirýshileri egistikterde qar toqtatý sharasyn uiymdastyra almady. Bul máseleler kóktemde topyraqtyń ylǵaldylyǵyna keri áserin tigizetini anyq. Sondyqtan biyl qalyptasqan jaǵdaida Memleket basshysynyń Úkimettiń keńeitilgen otyrysynda egin egý jumystaryn ýaqtyly júrgizý úshin sharýashylyqtarǵa barlyq jaǵdai jasaý jónindegi tapsyrmasyn sapaly oryndaý óte mańyzdy», - dedi Aqylbek Kúrishbaev.
