Bilim kúni Mádeniet jáne sport ministri Aqtoty Raiymqulova elordadaǵy №72 mektep-litseidiń oqýshylary men ustazdaryn merekemen quttyqtady, dep habarlaidy QazAqparat.
Mektepke kelgen ministr aldymen robototehnika jáne STEAM-zerthanalaryn aralap shyqty. STEM-baǵyty (science, technology, engineering, math) negizgi akademiialyq pánderdi qamtidy. Bul jerde oqýshylardyń jeti kýrstan ótýine múmkindigi bar. Odan keiin jas jetkinshekterge sertifikattar beriledi. Robototehnika kabinetinde oqýshylar Mádeniet jáne sport ministrine óz robottarynyń múmkindikterin kórsetti.
«Osy oqý jylynyń eń basty jańalyǵy – «Pedagogtardyń mártebesi týraly» zańnyń qabyldanýy bolmaq. 16 tamyzda ótken tamyz konferentsiiasynda QR Prezidenti tórt jyl ishinde pedagogtardyń jalaqysy eki esege artatynyn málimdedi. Biz bul baǵyttaǵy qadamdar eldegi bilim sapasyn jaqsartýǵa úlken úles qosady degen úmittemiz», - dedi Aqtoty Raiymqulova.
Osydan keiin ministr jańa oqý jylyna qadam basqan oqýshylarǵa sáttilik tiledi.
«Qymbatty oqýshylar! Men sizderdi birinshi oqý kúnimen quttyqtaimyn. Mektep sizderdiń súiikti oryndaryńyzǵa ainalýyn tileimin. 11-12 jyldan keiin, iaǵni mektep bitirgen soń sizder mektep jyldaryn erekshe súiispenshilikpen eske alasyzdar. Men sizderge úzdik bolýǵa jáne ómirde súiikti isińizdi tabýlaryńyzdy tileimin. Ómirde óz jolyn taýyp, elimizdiń damýyna sapaly úles qosa berińizder», - dedi ol.
Osydan keiin vedomstvo basshysy litsei oqýshylaryna elektrondy fortepiano syiǵa tartty. Sondai-aq, ol ministrlerdiń jappai mektepterdi aralaýy izgi dástúrge ainalaryna senim bildirdi.
«Búgin maǵan №72 mektep-litseige baryp, bir jaǵynan resmi tulǵa - mádeniet jáne sport ministri retinde, ekinshi jaǵynan ana retinde kópshilikke tilek bildirý baqyty buiyrdy. Balalar 1 qyrkúiekte úlken úmitpen keledi. Biz olardy bolashaqta olimpiada, konkýrs, festivaldardyń jeńimpazdary bolady dep kútemiz. Sondyqtan, bul tamasha bastama dástúrge ainalǵanyn qalaimyn», - dedi ol.
Aita ketsek, elordadaǵy №72 mektepte 4 759 bala oqidy. Onyń 742-i mektep tabaldyryǵyn birinshi ret attap otyr. 150 bala biyl 11-synypty bitiredi.
