Mádeniet jáne sport ministri Aqtoty Raiymqulova Dimash Qudaibergendi qoldap jatqan demeýshilerdiń bárine alǵysyn aitty, dep habarlaidy QazAqparat.
«Álbette eń aldymen biz Dimashtyń árbir jetistigi úshin qýanatynymyzdy aita ketkim keledi. Ol – Qazaqstannyń azamaty. Osynda oqydy, kolledjdi bitirdi, Qazaq óner ýniversitetin aiaqtady. Ótken jyly magistr diplomyn aldy. Memlekettik shákirtaqymen birge ol «Daryn» syilyǵy men «Qazaqstannyń eńbek sińirgen qairatkeri» ataǵyn aldy. Bul – qurmeti joǵary ataq», - dedi Aqtoty Raiymqulova.
Ministr óz sózinde Dimashtan árdaiym qyzyqty jobalardy kútetinin bildirdi.
«Mádeniet jáne sport ministrligi óz tarapynan ony qoldaidy, Nur-Sultandaǵy, Máskeýdegi, Amerikadaǵy keshterin ótkizýge atsalystyq. Qazirgi tańda oǵan óte kóp demeýshi kómek kórsetetini aita ketkim keledi. Ol Qytaidaǵy «I am singer» baiqaýynyń jeńimpazy bolǵandyqtan, kelisimshartqa sáikes jeńimpaz sondaǵy belgili bir sharalarǵa qatysýy kerek. Dimash «Slavian bazary» baiqaýynda jeńgen kezde de ol sol jaqtaǵy (Belarýs) kontsertterge qatysqan edi. Árine Qytaidyń prodiýsserleri Dimashpen jumys júrgizýge asyq. Dimash Qudaibergen Qazaqstannyń brendine ainala bastady. Árine bizdiń mindetimiz – ony qoldaý», - dedi Aqtoty Raiymqulova.
