Ótken senbi kúni Aqtóbe qalasynyń QR Tuńǵysh Prezidenti atyndaǵy saiabaǵynda Qazaqstan Respýblikasynyń Prezidenti N.Á.Nazarbaevtyń dene shynyqtyrý men sportpen ainalysý boiynsha Qazaqstan halqyna joldaǵan «Seniń jańa qyryń» chellendjine qoldaý bildirý maqsatynda aýqymdy sporttyq-buqaralyq is-shara ótti.
Sporttyq is-sharaǵa Aqtóbe oblysynyń sport ardagerleri, sport qyzmetkerleri, bedeldi sportshylary jáne qala turǵyndary qatysty.
Chellendj barlyq óńirlerdiń turǵyndarynyń qatysýymen «Sporttyq Telekópir» túrinde uiymdastyryldy. Telekópir máni oblystarmen birigip saýyqtyrý gimnastikasyn jasaýǵa shaqyrý aiasynda boldy. Osylaisha, Astana qalasynda bastaý alǵan sharaǵa QR Mádeniet jáne sport ministri Arystanbek Muhamediuly qatysyp, onlain transliatsiia arqyly barsha qaýymdy Elbasynyń bastamasyn qoldap, chellendjge qatysýǵa shaqyrdy.
Oblystardyń qatysýshylary Astanadan berilgen starttan soń, arnaiy mýzykanyń súiemeldeýimen keshendi jattyǵýlar jasady.
Aqtóbe turǵyndary atalǵan sharany onlain-rejimde tamashalap, barlyq óńirlerdiń qatysýshylarymen bir mezette jattyǵý jumystaryn qaitalady. Áriqarai, aýa-raiynyń qolaisyzdyǵyna qaramastan Aqtóbe oblysynyń tanymal fitnes-ortalyqtarynan arnaiy shaqyrylǵan sport nusqaýshylarynyń kórsetken jattyǵýlaryn júrgizýdi jalǵastyrdy.
Aita ketsek, Memleket basshysy Nursultan Nazarbaev «Seniń jańa qyryń» atty aýqymdy aktsiiany bastady. Onda prezident qazaqstandyqtardy sportpen shuǵyldanýǵa shaqyryp, árqaisysyna mysal kórsetken bolatyn.
Jobanyń maqsaty — Qazaqstan halqynyń arasynda salaýatty ómir saltyn qalyptastyryp, sportqa degen súiispenshiligin oiatý.
Jobanyń erejeleri qarapaiym: qatysýǵa niet bildirgen Qazaqstandyqtar Challenge «Seniń jańa qyryń!» jobasynyń áleýmettik jelilerdegi (Instagram, Facebook, VKontakte) resmi paraqshalaryna jazylyp, jobanyń bastalý kúnin kútedi. Maýsymnyń 4-i men 25-i aralyǵynda qatysýshylar 21 kún boiy 30 minýttyq túrli jattyǵýlar keshenin oryndaidy jáne áleýmettik jelilerdegi óz paraqshalaryna #senińjańaqyryń #drýgoity heshtegimen foto/beine esep júktep, arnaiy geolokatsiiamen belgileýi kerek.
Joba sońynda Qazaqstan boiynsha 16 jeńimpaz anyqtalyp, olar 6 shildege josparlanǵan Open Air Event qorytyndy sharasyna qurmetti qonaq retinde qatysý múmkindigine ie bolady. Atalmysh shara respýblika boiynsha bir mezgilde iske qosylatyn aýqymdy fleshmob bolady dep josparlanyp otyr.
Jeńimpazdardy joba sońynda belgilengen formatta usynylǵan foto/beine esepterdiń negizinde arnaiy baiqaý komissiiasy anyqtaidy.
Qazaqstannyń barlyq aimaqtyq ortalyqtarynda kópshilikpen jattyǵýlar jasalyp, onyń barlyǵy ár óńirden tikelei efir arqyly ulttyq telearnada kórsetiletin bolady. Tikelei efirde estafetany óz óńirine joldaý qurmeti Challenge «Seniń jańa qyryń!» jobasynyń jeńimpazdaryna usynylady.
Búkil el boiynsha bir mezgilde iske qosylyp, salaýatty ómir saltyn qoldaýǵa baǵyttalǵan bul joba «Sport tarihyndaǵy eń aýqymdy jattyǵýlar» atalymyna laiyq bolmaq.
