19 qarasha kúni Angliia astanasy - Londonda ótetin Dimash Qudaibergenniń jeke kontsertine aqtóbelik oqýshy qyz qatysatyn boldy, dep habarlaidy QazAqparat.
«DQ» atty jańa shoý Ulybritaniiadaǵy Qazaqstannyń mádeniet kúnderi aiasynda ótedi. Kontsertti QR Mádeniet jáne sport ministrligi uiymdastyryp otyr. Oǵan Qazaqstan Respýblikasynyń Ulybritaniia men Soltústik Irlandiia Birikken Koroldigindegi Elshiligi qoldaý kórsetti.
Biyl jazda Aqtóbe qalasynda balalar baiqaýy ótken bolatyn. Oǵan Dimash Qudaibergen qonaq jáne táýelsiz sarapshy retinde qatysqan. Ol arnaiy júldeni 13 jasar aqtóbelik ánshi Nargiz Januzaqovaǵa tabystady. Jas qyz óz ánin tórt jyl buryn dúnieden ótken ákesine arnaǵan edi. Dimashtyń sózi boiynsha tańdaý jasaý ońaiǵa soqpady jáne ol qatysýshylardyń ónerine tánti boldy. Dimashtyń álemdik týrne aiasyndaǵy jeke kontsertteriniń birine qatysý múmkindigi dál osy Nargizǵa buiyrdy.
Oryndaýshy óz ýádesinde turdy. 19 qarashada Londonda Nargiz Januzaqova «Indigo at the O2» kontsert zalynyń sahnasynda «Astana - elimniń júregi» ánin oryndaidy. Osylaisha bul Qazaqstannyń jas talanttaryn qoldaý men damytýǵa qosqan taǵy bir úlesi bolmaq.
Eske sala ketsek, bul kesh QR Mádeniet jáne sport ministrliginiń Jas talanttardy qoldaý baǵdarlamasy aiasynda uiymdastyrylyp otyr. 10 jyl ishinde baǵdarlama 1000-nan astam jas darynnyń halyqaralyq deńgeidegi baiqaýlarǵa qatysýyna septigin tigizdi. Baǵdarlamaǵa shyǵarmashylyqtyń ártúrli salasynyń ókilderi qatysa alady: sýretshiler, modelder, sángerler, ánshiler, mýzykanttar.
