Aqtóbe qalalyq sotynda sottalýshy Aisulý Ordaqulovaǵa qatysty qylmystyq is qaraldy. Ol tanysynyń qujattaryn iemdenip, onlain túrde 12 nesie rásimdegen, dep habarlaidy QazAqparat.
№2 Aqtóbe qalalyq sotynda 31 jastaǵy Aisulý Ordaqulovaǵa qatysty qylmystyq is qaraldy. Oǵan Qylmystyq kodekstiń «Alaiaqtyq» baby boiynsha aiyp taǵyldy. Is materialyna súiensek, A.Ordaqulova «kommýnaldyq qyzmet tólemin jasaimyn» degen syltaýmen tanysynyń jeke kýáligi men ekinshi deńgeili bank kartasyn iemdengen. Keiin qujattardy onlain nesie rásimdeýge paidalanǵan. Sóitip 2017 jyldyń qarasha-jeltoqsan ailarynda 12 nesie rásimdegen. Sottalýshy Aisulý Ordaqulova sotta bar kinásin moiyndap, aqshany óz qajettiligine jumsaǵanyn aitty.
«Memlekettik aiyptaýshy sottan A.Ordaqulovaǵa 3 jyl merzimge bas bostandyǵynan aiyrý jazasyn taǵaiyndaýdy surady. Sot qylmystyq quqyq buzýshylyqtyń sipaty men qoǵamdyq qaýiptilik dárejesin, jaýapkershilik pen jazany jeńildetetin mán-jailardy, kináliniń jeke basyn eskere otyryp, A.Ordaqulovany 3 jyl 3 ai merzimge bas bostandyǵynan aiyrý jazasyn taǵaiyndady. Sot úkimi zańdy kúshine engen joq»,- dep habarlady oblystyq sottyń baspasóz qyzmeti.
