«Birgemiz: Bilim» jalpyulttyq jobasy aiasynda aqtóbelik eriktiler de aýyl-aimaqtaǵy oqýshylarǵa shet tilin úiretip jatyr. Olar qashyqtan oqytý kýrsynyń aldynda ózderi biliktiligin arttyrdy, dep habarlaidy "Ult aqparat".
Aýyl balasy úshin aǵylshyn tilin úirenýde esh kedergi bolmaýy tiis. Olar da qalada bilim alatyn oqýshylar sekildi tiimdi ádisti tolyq qoldana alady. Bul joly aqtóbelikterge eriktiler kómektesti. Al ádisteme «Birgemiz: Bilim» jalpyulttyq jobasy aiasynda daiyndaldy. Aqtóbe úshin «A.Baitursynuly Bilim akademiiasy» mekemesi arnaiy oqý materialdaryn ázirlep berdi.
«Eriktiler qatarynda stýdentter, jas muǵalimder, tájiribeli ustazdar da bar. Dál qazirgi ýaqytta aýyl balalary aǵylshyn bilin qashyqtan meńgerip jatyr. Al bilim alýshylardyń kóbi kópbalaly, áleýmettik jaǵynan az qamtylǵan otbasynan shyqqandar. Sol sebepti kei kezde internetke qosylýda qiyndyq týyndaityny jasyryn emes. Bul bilim alamyn, oqimyn degen oqýshylarǵa kedergi bolmady. Olar mobildi bailanysqa shyqty. Barlyǵy 11 aýdannan 250 bala qatysty. Sabaqty 15 erikti berip jatyr», - dedi eriktilerdiń óńirlik úilestirýshisi Narqozy Qartjan.
Erikti Gúlmira Abatqyzy qazir bir topqa sabaq berip tur. Ol aýyl balalarynyń shet tilin bilýi úshin tájiribesimen bólisti.
«Biz aldyn ala onlain sabaq berý ádisin úirendik. Maqsat – aǵylshyn tilin úiretýde qyzyqty ádis-tásildi qoldaný. Sóitip til úiretý, olardyń bilimin jetildirý. Balalardyń aǵylshyn tilin meńgerý deńgeii – bazalyq. Zomm platformasymen bailanysqa shyǵamyz, keide áleýmettik jelini qoldanamyz. Tańerteń tapsyrma beriledi, taqyryp naqtylanady. Túste olardyń aiaq alysyn, daiyndyǵyn qaraimyz. Eger suraqtary bolsa, qosymsha baǵyt beremiz», - dedi Gúlmira Esenǵosova. Erikti aýyl balasyna basymdyq beretin jobanyń óte tiimdi ekenin aityp beredi. Sebebi shalǵai eldimekenderde qosymsha sabaq alyp, repetitorǵa barý óte sirek kezdesedi.
«Oqýshylardyń aǵylshyn tiline degen qyzyǵýshylyǵy joǵary dep aita almaimyn. Sondyqtan óz bilimimiz ben biliktiligimizge súienip, jańa ádisterdi de qoldanamyz. Qiyny – qashyqtan oqytý. Muǵalim men oqýshy bir-birin kórmese, túsirdirý ońai emes. Alaida oqýshylar keri bailanysqa shyǵyp, rizashylyqtaryn bildirip jatyr. Eshkimdi mindettemeimiz, áý basta jaýapkershilikpen qaraý qajet ekenin uǵyndyrdyq. Bilim qajet bolsa, oqýy tiis. Muny olar túsindi. Olardyń arasynda bolashaqta aǵylshyn tili mamany bolýdy qalaityndary da bar», - dedi Gúlmira Abatqyzy.
Aita keteiik, oqýshylardyń bilim deńgeiine qarai top arasynda aýystyrýǵa múmkindik berildi. Tildi meńgerý qabileti joǵary balalar úzdikter qataryna qosylsa, keibiri bazalyq deńgeiden bastady. Aldaǵy ýaqytta Aqtóbede pándik olimpiada, ǵylymi jobalarǵa daiyndyq kýrstary ótedi. Qazir olarǵa dáris beretin eriktiler iriktelip jatyr.
