Aqtóbede 93 myńnan astam bala men júkti áiel, balasyn emizetin kelinshek vaktsinatsiialaýǵa jatady. Qazirgi kezde mektepte jáne emhanada vaktsinatsiialaý jumystaryna daiyndyq pysyqtalyp jatyr, dep habarlaidy QazAqparat.
Aqtóbe oblysyna Pfizer vaktsinasy kelisi aptada jetkiziledi. Oblystyq densaýlyq saqtaý basqarmasy basshysynyń orynbasary Aigúl Kúshtaevanyń aitýynsha, Ana men bala densaýlyǵyn qorǵaý ortalyǵynyń bazasyndaǵy ortalyq qoimaǵa 2 muzdatqysh kamera ákelindi.
«Vaktsinatsiialaýǵa 12 jáne odan joǵary jastaǵy jasóspirimder, júkti áielder, laktatsiia kezeńindegi áielder jatady. 12 jastan 18 jasqa deiingi jasóspirimderdi vaktsinatsiialaýdy bilim berý uiymdarynyń egý kabinetterinde júrgizý josparlanyp otyr. Ata-analarynyń nemese zańdy ókilderiniń qalaýy boiynsha jasóspirimder meditsinalyq uiymnyń egý pýnktterinde egilýi múmkin. Vaktsinatsiia júrgizer aldynda koronavirýsqa KVI men antidenelerdiń bolýyna tekserý júrgizilmeidi», - dedi oblystyq densaýlyq saqtaý basqarmasy basshysynyń orynbasary Aigúl Kúshtaeva.
Aita keteiik, Aqtóbe oblysy boiynsha 93 myńnan astam adamdy Pfizer vaktsinasymen egý josparlanǵan. Onyń 70 myńnan astamy bala.
