Aqtóbe oblysy boiynsha 10 myńǵa jýyq adam vaktsina qabyldady. Óńirge taǵy 20 myń doza jetkizildi, dep habarlaidy "Ult aqparat".
Ótken táýlikte oblys boiynsha taǵy 116 adamnan koronavirýs infektsiiasy anyqtaldy. Búginge deiin barlyǵy 6236 jaǵdai tirkelse, onyń 77 paiyzdan astamy jazyldy.
«Qazir 562 adam infektsiialyq statsionarlarda em alyp jatyr. Onyń 395-i Aqtóbe qalasynda. 35 naýqas jansaqtaý bóliminde. Tórteýi ókpeni jasandy jeldetý apparatyna qosylǵan. Virýstan saqtanýdyń eń tiimdi joly – vaktsina. Qazirgi kezde 10 myńnan astam adam ekpe qabyldap úlgerdi. Taǵy 20 myń doza jetkizildi. Turǵyndar meken jaiy boiynsha emhanaǵa kelip, vaktsina qabyldai alady», - dedi oblystyq densaýlyq saqtaý basqarmasy basshysynyń orynbasary Bekbolat Izbasarov.
Qazirgi kezde úi karantinine jiberilgender sany artyp barady. 3300-den astam adam eki apta boiy dárigerler baqylaýynda bolýy tiis.
«Monitoring toptardan jáne jergilikti politsiia qyzmetinen túsken materialdarǵa sáikes 176 aiyppul salyndy. Aiyppul kólemi – 24,5 million teńge. Úilestirý ortalyǵynan túsken habarlama negizinde taǵy 21 tekserý júrgilizip, 2 million teńgeden astam aiyppul salyndy. «Qyzyl» aimaqtaǵy óńir turǵyndaryn sanitariialyq talapty saqtaýǵa shaqyramyz. Ramazan aiynda musylmandarǵa bir ai boiy oraza ustaý paryz etilgen. Degenmen toptalyp, aýyzasharǵa barýǵa nemese úiine syrttan adam shaqyrýǵa bolmaitynyn eskertemiz. Árkim óz shańyraǵynda, otbasy múshelerimen birge bolǵany durys. Sondai-aq, indetke bailanysty biyl meshitterde taraýih namazy oqylmaidy», - dedi oblystyq sanitariialyq-epidemiologiialyq baqylaý departamentiniń basshysy Nursulý Berkimbaeva.
