Qazaqstandyq rejisser Ásiia Baiǵojina túsirgen «Senim jolynda» derekti filmi Minsk qalasynda ótken «Eýraziia.DOC» atty TMD elderiniń derekti kinolary festivalinde jeńimpaz atandy, dep habarlaidy QazAqparat tilshisi «Qazaqfilm» kinostýdiiasyna silteme jasap.
Qazaqstan Respýblikasy Mádeniet jáne sport ministrliginiń tapsyrysy boiynsha Sh.Aimanov atyndaǵy «Qazaqfilm» AQ túsirgen «Senim jolynda» derekti filmi qoǵamymyzdaǵy ózekti máselelerdiń biri - din jolyndaǵy adasýshylyq týraly baiandaidy. Negizgi epizod - dúiim eldi dúrliktirgen, birneshe adamdardyń ómirin qiyp, 40-qa jýyq jergilikti turǵyndardy jaralaǵan qandy oqiǵa - 2016 jyly maýsymnyń 5-inde bolǵan Aqtóbedegi terakt.
"Festivaldiń qazylar alqasy úsh filmdi úzdik dep atady, onyń ishinde bizdiń de filmimiz bar. Festivaldiń bas júldesi reseilik «Forsaj» filmine buiyrdy. «Senim jolynda» filmin kórermen jaqsy qabyldady. Tipti, keibireýleri osyndai jaǵdailardyń (dini ekstremizm men terrorizm) Qazaqstan jerinde oryn alǵany týraly estip tań qaldy. Film eki jyl buryn jaryq kórdi. Alaida búgingi kúni osy filmge qyzyǵýshylyq kóp bolyp jatyr. Festivaldiń uiymdastyrýshylary filmniń úzindilerin ǵalamtorda kórip, meni tapqan. Sol úshin de, uiymdastyrýshylarǵa alǵysymdy bildiremin. Jáne de Minskige birinshi ret kelip otyrmyn, bul da men úshin qýanysh. Aita ketsem, festivalge stsenariidiń teń avtory Mereke Qasenova da shaqyrylǵan bolatyn", - dedi rejisser Ásiia Baiǵojina.
«Eýraziia.DOC» atty TMD elderiniń derekti kino festivali osymen úshinshi ret ótkizilip otyr. Biyl festivalge qatysýǵa 23 elden 150 filmder úmit bildirgen. Onyń ishinen negizgi baiqaýǵa 12 eldiń 24 derekti filmi irikteldi.
Festivaldiń basty maqsaty - Dostastyq elderiniń talantty dokýmentalist-redjisserlerin qoldaý, televiziialyq filmderdi jáne kinopýblitsistikany jaryqqa shyǵaryp júrgen jas kinogerlerdiń esimin ashý, shyǵarmashylyq bailanystardy nyǵaitý bolyp tabylady.
Eske sala ketsek, Aqtóbedegi terakt týraly derekti film TMD elderiniń festivaline qatysyp jatqanyn habarlaǵan bolatynbyz.
