2 sáýirde Aqtóbe oblysynda koronavirýs juqtyrǵan 72 jastaǵy áiel adam – osydan eki kún buryn Covid-19 dertine shaldyqqan er adamnyń sheshesi. Bul týraly Aqtóbe oblysy densaýlyq saqtaý basqarmasynyń basshysy Áset Qaliev habarlady.
Áset Qalievtiń sózinshe, balasynan koronavirýs tabylǵannan keiin zeinetker 31 naýryzda Aqtóbedegi provizorlyq gospitalge jetkizilgen.
Zeinetker áieldiń koronavirýs juqtyrǵan uly 20 naýryz kúni Almaty arqyly Egipetten ushyp kelgen. Óz úiinde karantinde bolǵan turǵyn 9 kúnnen soń dene qyzýy kóterilip, jedel járdem shaqyrǵan.
Koronovirýs juqtyrǵan sheshesi men balasy turǵan podezd qazir oqshaýlanǵan. Bul týraly sol úidiń turǵyny, virýs juqtyrǵan turǵyndardyń kórshisi 80 jastan asqan Anna Dýshinkina aitty.
Egipetke baryp, koronavirýs juqtyryp alǵan kórshisi týraly Anna Dýshinkina «Qyryqtyń ústindegi jigit. Egipetke joldamany jumys ornynan tegin bergen. Egipette alty kún demalyp, Almatyǵa jetkennen keiin otbasyna habarlasyp, Aqtóbege kele sala 14 kún karantinde bolatynyn aitqan. Áieli men qyzynan osy aralyqta týystaryna bara turýyn ótingen. Al anasy asa mán bermese kerek. Balasynyń eskertýine qaramastan ol óz úiinde qalǵan» dedi.
Turǵynnyń aitýynsha, búgin arnaiy kiim kigen mamandar karantindegi podezdi ekinshi márte dezinfektsiialap ketken.
Aqtóbe oblystyq densaýlyq saqtaý basqarmasy basshysy Áset Qaliev Egipetten oralǵan aqtóbeliktiń jaǵdaiy kesheli beri aýyrlap ketkenin aitady. «Onyń jaǵdaiy ortasha aýyr. Aqtóbede virýs tabylǵan qalǵan tórt naýqastyń jaǵdaiy turaqty» deidi Áset Qaliev.
Qazir Aqtóbede koronavirýs juqtyrǵandar sany bes adam boldy. Zeinetker áiel men ulynan basqa úsh adam Ispaniia, Túrkiia, jáne Reseiden kelgen.
