Aqtóbe oblysynda biyl qańtar aiynda tiridei órtenip ketken 52 ózbekstandyqqa qatysty sot isiniń bastapqy tyńdaýy ótti, dep habarlaidy Sputnik tilshisi.
Qaiǵyly oqiǵa 18 qańtarda saǵat 10.30-da Aqtóbe oblysy Yrǵyz aýdanynda Samara-Shymkent tas jolynyń 1068-shi kilometrinde Qalybai aýylyna jaqyn jerde bolǵan edi. 57 jolaýshy mingen avtobýstan órt shyǵyp, 52 adam qaza tapty – bári Ózbekstan azamattary. Aman qalǵan úsh júrgizýshi – qazaqstandyqtar, taǵy eki ózbek azamaty da ólim aýzynan qalǵan.
Júrgizýshiler Barat Tańatarov, Nurjan Qyrǵyzbaev jáne Maqsat Pernebekov órt qaýipsizdigi talaptaryn buzý, kóliktik quraldardy paidalaný erejelerin saqtamaý saldarynan eki nemese odan da kóp adamnyń qaza tabýy boiynsha aiyptalǵan. Qylmystyq is 52 tomnan turady, 100-den astam adam jábirlenýshi retinde tirkelgen. Órtenip ketken segiz jolaýshynyń ókilderi júrgizýshilerden moraldyq shyǵyn talap etken: 600 ben 800 myń teńge aralyǵynda.
Júrgizýshilermen birge sottalýshylar qatarynda kepilmen bosatylǵan taǵy eki adam bar: Bahadir Berdibaev – avtobýsty reiske shyǵarýǵa ruqsat bergen mehanik – oǵan tehnikalyq aqaýy bar avtobýsty baǵdarǵa jiberdi degen aiyp taǵyldy jáne janyp ketken avtobýsqa ielik etetin tasymaldaýshy firmanyń basshysy Nurlybek Telepbaev. Zań normasy boiynsha jumysshylardyń áreketi úshin ol da jaýap berýi tiis.
Eki sottalýshy kinásin jartylai moiyndady – Nurjan Qyrǵyzbaev pen Maqsat Pernebekov.
Qyrǵyzbaevtyń aitýynsha, qaraly kúni janarmai beketinde avtobýsqa sapasyz qysqy soliarka quiǵandyqtan, kóliktiń qozǵaltqyshynda janarmai qatyp qalypty. Sol sebepti joldyń shetine toqtaýǵa týra keledi. Avtobýs júrgizýshileri jolai ótip bara jatqan kólikterden járdem kútedi. Tergeý barysynda Qyrǵyzbaev aityp bergendei, avtobýstyń ishi tez sýyta bastaidy. Sol kezde júrgizýshiler kóliktiń motoryn dánekerleýshi shammen jylytpaq bolady, biraq Maqsat Pernebekov bul oidyń óte qaýipti ekenin aityp, bas tarqan kórinedi. Qyrǵyzbaev jolaýshylardy aiap ketip, dánekerleýshi shamdy jaǵyp, adamdar biraz jylynyp alsyn degen oimen avtobýstyń ishine qoiady.
Sol kezde júrgizýshiler qastarynan ótip bara jatqan avtobýsty baiqap qalyp, salonnan atyp shyǵyp, kómek suraýǵa umtylady. Dál sol avtobýstyń júrgizýshisi Setra avtobýsynyń ishinen tútin shyqqanyn baiqaǵan eken. Qyrǵyzbaevtyń aitýynsha, órt jolaýshylar arasyndaǵy janjal saldarynan shyqqan. Jolaýshylardyń biri ashýǵa býlyǵyp, dánekerleýshi shamdy teýip qalady, saldarynan avtobýs órtene bastaidy. Sol jolaýshy órtten aman qalǵandardyń biri eken. Dárigerlerdiń málimetinshe, onyń aiaǵy kúiip qalypty.
Júrgizýshiler esikti ashqanda, avtobýs ishine ottegi kirip, órt odan beter lapyldap jana bastaidy. Sonyń kesirinen jolaýshylar avtobýstan shyǵa almaǵan. Ári kóliktiń ishinde júk te kóp bolypty. Eki qabatty avtobýstyń joǵarǵy qabatynda jolaýshylar otyrady da, al birinshi qabatyna júk tiegen. Jeti minýt ishinde kóliktiń túgi qalmai janyp ketti.
Sottalýshylardyń advokattary sottyń Yrǵyz aýylynda emes, Aqtóbede ótýin surap, ótinish bildirdi.
Advokat Nurjamal Ájiǵalievanyń sózine súiensek, zańǵa sáikes istiń tergelýin sottalýshylarǵa aiyp taǵylǵan jerde, iaǵni Aqtóbede ótkizýge bolady.
"Budan bólek, Aqtóbeden 600 shaqyrym jerdegi Yrǵyz aýylyna qaita-qaita barýǵa týra keledi. Sotqa qatysýǵa niet bildirgen jeti jábirlenýshiniń ókilderin oilańyzdar. Olar Ózbekstannan kelýge májbúr. Sonymen qatar, qamaýǵa alynbaǵan sottalýshylar da advokattarmen birge Yrǵyzǵa kelýi tiis. Aýylda adamdardy ornalastyratyn qonaq úi de joq", — dedi advokat Serik Mahambetovke.
Sot isti Aqtóbede ótkizýden bas tartyp, kelesi otyrysty jetinshi tamyzǵa belgiledi. Alaida qorǵaýshylar bul sheshimge kelispei, oblystyq sotqa shaǵym túsirmek. Olardyń aitýynsha, qoǵam nazaryna ilikken isti shý shyǵarmas úshin ádeii aýdanda ótkizgeli otyr. Onyń ústine, qorǵaýshylardyń isti tergegen prokýrorlar men tergeýshilerge de qoiar suraǵy az emes. Máselen, avtobýs ishinde dánekerleýshi shamdy teýip qulatqan jolaýshy nege sottalýshylarmen birge sot aldyna kelmedi? Taǵy bir aita ketetin jait, beketterdiń birinde avtobýs qujattaryn teksergen jol politsiiasy qyzmetkerinen tergeý barysynda jaýap alynypty. Ol istiń kýágeri bolyp tirkelgen eken. Al bul jaiynda advokattar beihabar bolǵan kórinedi.
