Foto:el.kz
«Ádildik jáne Órkendeý» qoǵamdyq qorynyń belsendileri sý tasqynynan zardap shekken óńirlerge gýmanitarlyq kómek jiberip, úilerdi sý tasqynynan qutqaryp jatyr, dep habarlaidy El.kz aqparat agenttigi.
«Ádildik jáne Órkendeý» qoǵamdyq qorynyń aimaqtaǵy belsendileri el boiynsha sý tasqynyna jol bermeý jónindegi is-sharalarǵa belsene qatysyp, zardap shekken óńirlerdiń turǵyndaryna kómek kórsetip jatyr.
«Ádildik jáne Órkendeý» qoǵamdyq qorynyń Aqtóbe ókildiginiń basshysy Aleksandr Mandrykin óńirde tótenshe jaǵdai rejiminiń jariialanýyn kútpei birden iske kirisken. Jaǵdaidy obektivti baǵalai otyryp, bilikti ekolog-injener áriptesterimen birge bógetter men bekinister salý úshin jumys tobyn uiymdastyrdy.
Men osy óńirde turamyn jáne qaýipti aimaqtardy jaqsy bilemin. Sondyqtan biz turǵyn úilerdi úlken sýdan qorǵaý úshin aldyn ala qimyldap, óz kúshimizben bógetter turǵyza bastadyq. Jaǵdaidyń kúrdeliligine qaramastan, biz 50 úidiń 30-yn sý tasqynynan qutqaryp qaldyq, - deidi qordyń aimaqtaǵy belsendisi Aleksandr Mandrykin.
Buǵan deiin Aqtóbe qorynyń ókilderi sý tasqyny saldarynan qiyn jaǵdaiǵa tap bolǵan qazaqstandyqtardyń atyna ózderiniń bir kúndik jalaqylaryn aýdarǵan bolatyn.
Tabiǵi apat el azamattaryn biriktirdi. Demalys kúnderi «Ádildik jáne Órkendeý» qoǵamdyq qorynyń belsendileri Atyraýǵa gýmanitarlyq kómek retinde, tasqyn sýdyń bógeý úshin 10 myń qap jiberdi.
Qordyń Atyraý oblysyndaǵy ókildiginiń basshysy Alena Asambaevanyń aitýynsha, Jaiyq ózeniniń jaǵalaýyn bógeý úshin qum salynǵan qapshyqtar qajet. Osy kúnderi mundai qorǵanys ádisi Atyraýdyń 20 ýchaskesinde, sondai-aq qala mańynda bir mezette júrgizilýde. Tipti túnde de toqtamaidy. Oblys turǵyndary óz qarajattaryna qaptar, kúrekter, qolǵaptar jáne janarmai satyp alýda.
Qordyń óńirlik ókildigi «Atyraý eriktileri» chatyn ashty. Qazir onyń 1023 qatysýshysy bar. Chat arqyly qala eriktileri bir-birine qajetti zattar men jabdyqtardy satyp alýǵa kómektesedi, bul chatqa jaqyn mańdaǵy eldi mekenderden bóget salyp berýge kómek surap ta jazyp jatyr. Bul iske áielder qaýymdastyqtary men úkimettik emes sektor ókilderi de qosylyp, eriktilerge ystyq tamaq taratý taratyp jatyr, - deidi eriktilerdiń janynda júrgen qor belsendisi Alena Asambaeva.
Batys Qazaqstan oblysyndaǵy Qor belsendileri de sý tasqynynan zardap shekken aýdandarǵa kómegin kórsetip jatyr. Osylaisha olar tabiǵi apattyń zardabyn azaitý úshin jergilikti atqarýshy organdarymen, eriktilerimen jáne ózge de uiymdarymen kúsh biriktirdi.
Men, meniń qordaǵy áriptesterim belsendi azamattyq ustanymy bar azamattar retinde elde bolyp jatqan oqiǵalarǵa nemquraily qarai almadyq. Óńir belsendileriniń deni sý tasqynyna qarsy kúresip júr. Dýlat Júsipqaliev, Gúlziia Ahmetova sekildi aimaqtaǵy qor ókilderi eriktilermen birge belsendi túrde qyzmet etip, gýmanitarlyq júkterdi qabyldaýmen jáne jóneltýmen ainalysyp júr. Al, qoǵam belsendisi Mariia Pirog kún saiyn is-sharalardyń bel ortasynda júrip, sý tasqynynan zardap shekken Bórili aýdanynyń turǵyndaryna gýmanitarlyq kómek uiymdastyrdy. Ol eriktiler úshin túski as uiymdastyryp, olardy qajetti zattarmen qamtamasyz etip otyr, - dedi «Ádildik jáne Órkendeý» qoǵamdyq qorynyń BQO-daǵy ókili Asylanbek Gýbashev.
Qor belsendisi aqparattyq jumys júrgizip qana qoimai, eriktilermen birge qorǵanys bógetterin salýmen ainalysady. Ol oblysta Batys Today biryńǵai telegram-kanaly jumys isteitinin, onda Batys Qazaqstan óńirindegi ahýal týraly ózekti aqparat jariialanatynyn habarlady. Asylanbek Gýbashevtiń aitýynsha, qazir zardap shekkenderge birinshi kezekte jyly kiim, matratstar men tósek-oryn kerek. Sondai-aq, sý basý oryndarynda jumys isteý úshin shamdar, shatyrlar, batpaqqa qarsy rezeńke etikter, úrlemeli qaiyqtar, kombinezondar men gidrokostiýmder qajet.
Qazaqstannyń barlyq óńirlerinde «Ádildik jáne Órkendeý» qorynyń qoǵamdyq qabyldaýlary jumys isteidi. Sý tasqyny kezinde qordyń aimaqtaǵy qyzmetkerleri gýmanitarlyq kómek jinaý jáne taratý, eriktilerdiń jumysyn úilestirý fýnktsiialaryn atqarady. Ár azamat qordyń ókildigine kómek úshin júgine alady nemese eldi mekenderdi tezirek qalpyna keltirýge qor arqyly óz úlesin qosa alady.
Aldaǵy kúnderi birden birneshe óńirde ózenderde sý kólemi ulǵaiady degen boljam bar. «Ádildik jáne Órkendeý» qoǵamdyq qorynyń ókilderi sý tasqynyna qarsy jáne onyń zardabymen kúresip, bóget pen bekinister salý, sondai-aq muqtaj jandarǵa kómek kórsetý jónindegi aýqymdy ári mańyzdy isterin jalǵastyra beredi.
