Aqtóbe oblysynda karantin shekteýi kúsheidi. Búgin jańa qaýly shyqty, dep habarlaidy QazAqparat.
Aqtóbede ótken táýlikte 73 jaǵdai tirkeldi. Olardyń 80 paiyzdan astamy derttiń simptomdy túrine shaldyqqan. Qazir Aqtóbe qalasy, Mártók, Alǵa, Oiyl, Temir aýdandarynyń turǵyndary infektsiialyq aýrýhanalarǵa jatqyzylyp, em alyp jatyr. Al naýqastarmen qarym-qatynasta bolǵan adamdar úi karantininde. Olardyń qatary búginde 1300-ge jýyqtady. Oblystyq sanitariialyq-epidemiologiialyq baqylaý departamentiniń basshysy Nursulý Berkimbaeva búgin jańa qaýly shyǵardy.
«Konferentsiia, kórme, forým, oiyn-saýyq, sporttyq, sondai-aq adamdar kóp jinalatyn otbasylyq, saltanatty, estelik jáne basqa da is-sharalardy ótkizýge bolmaidy. Karaoke, biliard, kompiýterlik klýbtar, túngi jáne oiyn klýbtary, boýling-ortalyqtary, kalian, jabyq úi-jailardaǵy balalar oiyn alańdary jáne attraktsiondar jumys istemeidi. Balabaqshalarda kezekshi toptar ǵana qyzmetin jalǵastyrady. Mektepterde ashana jabylady. Qalaaralyq, oblysaralyq jáne oblysishilik turaqty avtobýstardyń, shaǵyn avtobýstardyń qozǵalysy shekteledi. Kinoteatr, teatr, murajailar, kitaphana da onlain qyzmet kórsetedi. Ramazan aiynda aýyzashar jasaýǵa bolmaidy», - dep habarlady oblystyq sanitariialyq-epidemiologiialyq baqylaý departamentiniń baspasóz qyzmeti.
Aita keteiik, dini obektilerde ujymdyq is-sharalar ótpeidi. Qoǵamdyq tamaqtaný oryndary jumys jáne senbi kúnderi saǵat 07.00 – 22.00 deiin jumys istep, jeksenbi kúnderi tek tapsyrysty jetkizedi. Jeksenbi kúni saýna, monshalar, sulýlyq salondary jabyq bolady. Saýda, oiyn-saýyq ortalyqtary men saýda úileri de jeksenbi kúni jabylady.
