Eldi dúrliktirip, 7 adamnyń ómirin qiǵan lańkester Siriia men AQSh-qa baryp, jihad jasaimyz dep oilaǵan. Iaǵni, olardyń keibiri topty bastaǵan Dmitrii Tańatarov pen Arman Aitýǵannyń úndeýin túsinbegen. Jabyq ótip jatqan sot otyrysynyń barysy týraly oblystyq sottyń baspasóz qyzmeti búgin brifing ótkizip, kýágerler men jábirlenýshilerden, sottalýshylardan jaýap alynyp bolǵanyn málimdedi, dep habarlaidy Ult.kz tilshisi Baq.kz portalyna silteme jasap.
5 maýsymdaǵy lańkestik oqiǵaǵa qatysty sot otyrysy KA 168/1 túzetý mekemesinde jabyq ótip jatyr. Sol sebepti oblystyq sottyń baspasóz qyzmeti ár apta saiyn qorytyndy jasap otyrady. Belgili bolǵany, 66 jábirlenýshi men 48 kýágerden, sottalýshylardyń barlyǵynan jaýap alynyp boldy. Olar lańkestik top quryp, qarýly shabýyl jasaǵanyn joqqa shyǵarmaidy, jasaǵan isine ókinedi. Degenmen, kisi óltirý boiynsha taǵylǵan aiyppen kelispei otyr.
«Daiyndalyp jatqan asa aýyr qylmys týraly bile tura habarlamaǵandary úshin aiyptalǵan sottalýshylar da jasaǵan qylmystyq áreketteri úshin ókinip, óz jaýaptarynda qylmystyq jaýapqa tartylatyndaryn bilmegenin aitty. Sottalýshylardyń keibiri sol kúni páterdi «terroristik toptyń basshylary D.Tańatarov pen A.Aitýǵannyń úndeýleriniń maǵynasyn anyq túsinbei, Siriia men Amerikada jihad jasaýǵa shaqyryp jatyr dep oilaǵan»,- deidi Aqtóbe oblystyq sotynyń baspasóz qyzmetiniń basshysy Iliada Dosova.
Sot otyrysy kezinde memlekettik aiyptaýshy men qorǵaýshylardyń qosymsha kýágerden jaýap alý ótinishi qanaǵattandyrylǵan. Máselen, kýágerdiń biri páterden №6655 áskeri bóliminiń qyzmetkeri Chernyshevtyń qarýynyń oq-dárisin taýyp alǵan. Oq-dári as úidegi jaimanyń astynan shyqty. Keiin páter iesi birden quqyq qorǵaýshylarǵa habar bergen.
«Búgingi sot otyrysynda jábirlenýshilerdiń talap aryzy, olarǵa qosa tirkelgen ózge de qujattar men sottalýshylarǵa qatysty minezdemeler zertteldi. Sotqa 15-ten astam talap aryz tústi. Onyń ishinde «Avtopark» JShS, «Pantera» qarý jaraq dúkeni men №6655 áskeri bóliminen túsken talap aryz bar. Sot otyrysynda protseske qatysýshylardyń ótinishteri qaraldy»,- dedi I.Dosova.
Eske salsaq, sot otyrysy 24 qyrkúiekte bastaldy. Lańkestik oqiǵasy boiynsha 29 sottalýshy jaýap berip jatyr. Onyń 9-y qolyna qarý alyp, oqiǵaǵa tikelei qatysty. 18-i daiyndalyp jatqan qylmysty bile tura habarlamaǵan, ekeýi qylmysty jasyryp qalǵan.
Altynai SAǴYNDYQOVA
