Aqtóbede taksi júrgizýshisi qaiyrymdy isi úshin marapattaldy, dep habarlaidy "Ult aqparat".
Aqtóbe oblystyq politsiia departamenti búgin taksi júrgizýshisine alǵys hat tapsyrdy. Olar jolaýshynyń umyt qaldyrǵan 1,1 million teńgesin qaitaryp bergen.
"Aqtóbe oblystyq politsiia departamentiniń bastyǵy Mahambet Abisatov Aqtóbe qalasynyń eki turǵynyna alǵys hat tabystady.
10 qańtardan 11 qańtarǵa qaraǵan túni Aslan Nabi jáne onyń tanysy Daryn Embergenov jeke tasymaldaýmen ainalysyp júrip, er adamdy úiine deiin jetkizip salady. Biraz ýaqyt óte artqy oryndyqtan qomaqty qarjyny kóredi. Jeke tasymaldaýshylar kóp oilanbastan quqyq qorǵaý oryndaryna júginýdi uiǵaryp, №3 Almaty aýdany politsiia bólimine baryp, klientterdiń biri aqshany qaldyryp ketkendigi týraly aitady. Kóp uzamai politsiiaǵa er adam habarlasyp, takside 1 million 100 myń teńgesin qaldyryp ketkendigi týraly málim etken.
Aslan men Daryn bul isin erlik dep sanamaidy. Jastar eshkimge aqsha ońailyqpen kelmeitindigin ári zańǵa baǵyný, adamgershilik ár azamattyń paryzy dep biledi. Bul qarajat emge nemese nesie qaryzyn óteýge arnalǵan da bolýy múmkin. Osy oimen olar aqshany tiesili iesine qaitarýdy jón kórgen", - dep habarlaidy oblystyq politsiia departamentiniń baspasóz qyzmeti.
