Aqtóbede taǵy bir adamnan koronavirýs infektsiiasy anyqtaldy. Naýqas «Aqtaý-Aqtóbe» reisimen ushyp kelgen, dep habarlaidy "Ult aqparat".
«Brifing bastalmas buryn aita keteiin, taǵy bir adamnan koronavirýs anyqtalǵany belgili boldy. Naýqas Aqtaý qalasynan búgin ushyp keldi. Ushaqtan túsken boida barlyǵy 18 adam oqshaýlanyp, analiz alyndy. Naýqas infektsiialyq aýrýhanaǵa jatqyzylady. Ózge jolaýshylar tekserilip jatyr. Kóbiniń saraptama qorytyndysy teris. Virýs juqtyrǵan adam Túrkiianyń Ystanbul qalasynan Aqtaýǵa, Aqtaýdan Aqtóbege kelgen. Shetelden keletinin bilgen soń biz ushaq jolaýshylaryn birden baqylaýǵa alyp, tekserdik», - dedi osy ýaqytta onlain-brifing ótkizip jatqan oblystyq Taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nursulý Berkimbaeva.
Aita keteiik, Aqtóbede 31 naýryzdan bastap birqatar shekteý qoiylady.
Koronavirýs anyqtalǵan alǵashqy naýqastyń jaǵdaiy birqalypty, eki aptadan soń qaita analiz alynady.
