Aqtóbeniń 4 iri joǵary oqý ornynyń stýdentterine aqyly volonterlyq jumys usynylýda. Bul týraly qalanyń jastar resýrstyq ortalyǵynda aityldy, – dep habarlaidy QazAqparat.
«Biylǵy jyl eriktiler jyly dep jariialandy. Memleket basshysynyń Joldaýyna sáikes, eriktiler qozǵalysyn qoldaýǵa biyl kvotalar bólindi. Stýdent volonterlarǵa ai saiyn 57 myń teńgeden tólenip turady. 2020 jylǵa Aqtóbedegi 4 ýniversitettiń, onyń ishinde Qudaibergen Jubanov atyndaǵy, Saqtaǵan Baishev atyndaǵy, Meditsina jáne «Nur» qazaq-resei ýniversitetteriniń stýdentterine 244 kvota bólinip otyr. Iaǵni osy joǵary oqý oryndarynyń bilim alýshylary volonterlyq jumyspen ainalysa otyryp, eńbekaqy alatyn bolady. Biz qarttarmen jumys isteýge kómektesetin osyndai 100 eriktini izdeimiz», - dedi qalalyq jastar resýrstyq ortalyǵynyń basshysy Jandos Tabylǵanov.
Volonter bolý úshin stýdentterge www.qazvolunteer.kz saitynan tirkeýden ótý kerek, sodan keiin qalalyq ákimdiktiń ǵimaratyna kelip, resrstyq ortalyqqa júginýi qajet. Jumysyn aiaqtaǵannan keiin bilim alýshyǵa eńbekaqy beriletin bolady.
«Resýrstyq ortalyǵymyz qart, jalǵyzbasty aqtóbelikter, ardagerler, tyl eńbekkerleriniń aýlalaryn qardan tazartý jumystarymen ainalysady. Biz 50 aýlany tazalaýǵa kómektestik, biraq ótinishter áli de kelip túsýde. Taǵy 100 aqtóbelikke aýlalaryn qardan tazartýǵa kómektesý qajet», - dep atap ótti J.Tabylǵanov.
