Aqtóbede shoshqa fermasyna qatysty tekserý jumystary aiaqtaldy. Jer qunarlylyǵyn búldirgen, ekologiialyq talapty saqtamaǵan basshy qylmystyq jaýapqa tartylady, dep habarlaidy "Ult aqparat".
Aqtóbede Bestamaq aýylynyń turǵyndary, ekologtar men mal dárigerleri, oblys ákimdiginiń ókilderinen quralǵan komissiia alǵashqy qorytyndyny shyǵardy. Tekserý jumysy 10 kúnge sozyldy.
«Tekserý jumysy 20 qarasha kúni bastalyp, 2 jeltoqsan kúni aiaqtaldy. Tekserý qorytyndysynan soń ekologiia, jer qatynastary basqarmalary hattama toltyryp, kásipkerdi tanystyrdy. Shoshqa fermasynyń iesine qatysty Qylmystyq kodekstiń «Jerdi búldirý» baby boiynsha is qozǵalyp, tergeý júrip jatyr», - dedi Aqtóbe oblystyq prokýrorynyń orynbasary Azamat Qustanov.
Aqtóbe oblystyq jerdiń paidalanylýy men qorǵalýyn baqylaý jónindegi basqarma óz tujyrymyn jetkizdi.
«13,8 gektar jerdiń topyraq qunary búlingeni anyqtaldy. Iaǵni 5,6 gektar jer qazylyp, qatty jáne suiyq qaldyq kómilgen, qosymsha daiyndalǵan. Baibaqty ózeniniń boiyndaǵy sharýashylyqqa arnalǵan jerge qurylys jumystary júrgizilgen. Zańsyz karer de anyqtaldy. Sonymen birge 8 sharyrym jer qazylǵan. Keibiriniń eki 10 metr bolady. Qujattar jinalyp, oblystyq prokýratýraǵa is materialdary jiberildi. Zalalsyzdandyrý jumystary úshin bir jylǵa jýyq ýaqyt qajet bolady», - dedi Aqtóbe oblystyq jerdiń paidalanylýy men qorǵalýyn baqylaý jónindegi basqarmasy basshysy Abdýhat Myrzalin.
Al ekologtar ol jerden 189 tonna qaldyqtyń qazylyp alynǵanyn málimdedi.
«Turǵyndar aryzy boiynsha tekserý júrdi. Ol jerge tek ishek-qaryn, ólekse emes, turmystyq qatty qaldyq, qurylys materialy da kómilgen. Qaldyqtyń salmaǵy 189 tonnany qurady. Keltirilgen shyǵyn kólemi 40 million teńgeden asady. Taǵy bir anyqtalǵan jait, shoshqa fermasynda 40 myń basty baǵyp, kútýge ruqsat etilgen. Al munda 50-52 myń shoshqa ósirilgen. Bul da quqyqbuzýshylyq. Osy baǵyttaǵy keltirilgen shyǵyn 119 million teńge dep esepteldi. Qi saqtaý jáne qaldyq sý tógý zańdylyǵy saqtalmaǵan. Osy eki baǵyttaǵy jumysty toqtatýdy surap otyrmyz. Qaldyq sýdan synama alyndy. Shyǵyn kólemi aldaǵy ýaqytta anyqtalady», - dedi Aqtóbe oblystyq ekologiia departamentiniń bólim basshysy Ǵasyr Orynbasarov.
