Foto: batys.info
Aqtóbede aiyppul turaǵynan kólikterdi zańsyz satqan burynǵy politsei men kásipker sottaldy, dep habarlaidy «Ult aqparat» Diapazon portalyna silteme jasap.
Kommýnaldyq aiyppul turaǵy Bogoslov tas jolynyń boiynda ornalasqan. Ol jerde qylmystyq ister boiynsha tárkilengen kólikter turady. Olardy kúzetýge jyl saiyn biýdjetten aqsha bólinedi. Al aiyppul turaǵyn kúzetetin mekeme tender arqyly anyqtalady.
Byltyr naýryz aiynda tenderde "IP Kamanov E.M" jeńip aldy. Oǵan turaqty tapsyrǵanda 333 kólik bolǵan. Bir aidan keiin tekseris kezinde birneshe kóliktiń joǵalǵany anyqtaldy. Tergeý nátijesinde politsiia qyzmetkeri Azamat Qamanov ustaldy. Sol kezde ol patrýldik politsiiada vzvod komandiri bolǵan. Al tenderdi jeńip alǵan kásipker onyń ákesi bolyp shyqty. Aiyppul turaǵynyń jańa direktory Rýslan Qojaev ta politseidiń tanysy ekeni anyqtaldy. Qamanov ony ákesiniń atynan tenderge qatysýǵa kóndirip, artynan direktor qyzmetine qoiýǵa ýáde bergen.
Qojaev tenderdi jeńip alady. Turaqty qabyldap, jańa kúzet qoiady. Artynan Qamanov ekeýi óz josparyn oryndaýǵa kirisip, turaqta uzaq ýaqyt turǵan kólikterdi zańsyz satýdy bastaidy. Eks-politsei aldymen bir Toyota Camry-di tanysyna 2 million teńgege satyp jiberedi. Odan keiin jol apatyna túsken Shevrolet Cobalt kóligin 100 myń teńgege metal qabyldaý pýnktine tapsyryp tastaidy. Bul kólikte tórt birdei adam qaza tapqan. Tórteý de Ózbekstan azamattary. Budan bólek, Qojaev Kia markaly bir kólikti satqan. Sol úshin 6 million teńge alady. Biraq jańa iesi kólikti alyp kete almady. Sebebi tergeý sharalary bastalyp ketti.
Sotta ekeýi kinásin moiyndamai, bir-birine siltedi. Alaida eki "seriktestiń" kinási dáleldendi. Sot sheshimimen Qamanov 3,5 jylǵa bas bostandyǵynan aiyryldy. Oǵan qosa, memlekettik qyzmette ómir boiyna jumys isteýge tyiym salyndy. Al Qojaev 3 jylǵa sottaldy.
