Aqtóbe qalasyndaǵy Sút zaýyty aýdanynda úi órtenip ketti. Qazir 6 balaly otbasy týystarynyń úiin jaǵalap júr, dep habarlaidy QazAqparat tilshisi.
Aqtóbe qalasynda Baitóbetovter otbasy dalada qaldy. Órt keshe jergilikti ýaqytpen saǵat 15:00-de tirkeldi.
«Bir úide 8 jan turamyz. Meniń 6 balam bar. Balamyzdyń úlkeni 5-synypta oqidy, kishkentaiym - 3 ailyq. Keshegi órtten soń týystarymyzdy jaǵalap, pana izdep kettik. Sebebi sol kezde úide úsh balam ǵana boldy. Inim syrtta, garaj mańynda júrip, úsh bala dalaǵa jalań aiaq, jalań bas júgirip shyqqanda ǵana kórgen. Ishke kirip, qujattaryn almaq boldy. Biraq kóbi janyp, eki balanyń ǵana týý týraly kýáligi qaldy», - deidi úi iesi Murat Baitóbetov.
Órt bolǵan kezde úide 10, 5, 2 jastaǵy balalar ǵana bolǵan. Oinap otyrǵan balalar oiynshyq alatyn kezde ózge bólmeniń janyp jatqanyn kórgen. Úi ishin qara tútin basqan kezde qoryqqan balalar kiimsiz dalaǵa qashyp shyqqan. Úi ieleri órttiń neden shyqqanyn bilmeidi.
«Órt keshe saǵat 15:00-de boldy. Aldymen úiindegi zattary órtenip, keiin órt tóbege ulasty. Órt sóndirý qyzmetinen 8 adam 2 avtokólik bardy. Sonymen qatar, apatqa meditsina ortalyǵynan 3 adam, bir avtokólik jiberildi. Órt 15:38-de aýyzdyqtalyp, 16:17-de tolyq sóndirildi», - dep habarlady oblystyq TJD baspasóz qyzmeti.
