Aqtóbedegi iri munai kompaniialary jerasty sýyn lastap jatyr. Bul týraly Aqtóbe oblystyq tabiǵi resýrstar men tabiǵatty paidalaýdy retteý basqarmasynyń basshysy Nurjan Aqqul aitty, dep habarlaidy QazAqparat tilshisi.
Aqtóbedegi Kókjide qum alqabynda munai men tushý sý qorybar. Aýmaǵy 43 myń gektar bolatyn jerde «Ada Oil», «KMK Munai» JShS-i men «SNPS-Aqtóbemunaigaz»AQ-y munai óndirip jatyr. Tushy sýdyń quramyn jylyna tórt ret tekseretin oblystyq tabiǵi resýrstar men tabiǵatty paidalaýdy retteý basqarmasy sýdyń lastaný deńgeii azaiyp kele jatqanyn aityp otyr. Biraq munai kompaniialary aýyz sýdy túbegeili qorǵaý tehnologiiasyn áli qoldanbai otyr. «Kókjide qum alqaby jerasty tushy sý ken ornyn saqtaý maqsatynda buryn qurylǵan gidrogeologiialyq uńǵyma toraby arqyly sýdyń sapasyna baqylaý júrgizilip keledi. Monitoring júrgizilgen ýaqyttarda sýdyń quramynda munai, aýyr metaldar jáne taǵy da basqa lastaýshy zattar anyqtalyp otyr. Derekter boiynsha salalyq ministrliktermen tiisti jumystar júrgizilýde», - dedi Aqtóbe oblystyq tabiǵi resýrstar men tabiǵatty paidalanýdy retteý basqarmasynyń basshysy Nurjan Aqqul.
Aqtóbede aýany lastaityn tórt iri kompaniia bar. Olar munai-gaz, metallýrgiia salasyndaǵy iri óndiris oryndary. Máselen, «SNPS-Aqtóbemunaigaz» AQ, «QazaqOil» JShS, «Qazhrom» TUK» AQ, «Intergaz Ortalyq Aziia» AQ-nyń oblystyq filialy bir jylda 169 myń tonna qaldyqty aýaǵa tastaǵan. Onyń basym bóligi munai kompaniialaryna tiesili. Aýaǵa tastalǵan himiialyq elementter arasynda adam densaýlyǵyna asa ziiandy formaldegid, benzipiren, hrom, kúkirtti sýtek bar. Mamandardyń aitýynsha, 2015 jylǵa qaraǵanda Aqtóbede aýany lastaý kórsetkishi artqan. Sebebi, óńirde birneshe iri óndiris orny iske qosyldy. Onyń ishinde Aqtóbe rels-arqalyq zaýyty, Aqtóbe ferroqorytpa zaýytynyń №4 tsehy bar.
