Aqtóbede memlekettik qyzmetker kásipkerdi urǵan. Oqiǵa Qobda aýdanynda boldy, dep habarlaidy "Ult aqparat".
Karaokege barǵan memlekettik qyzmetker aqy tóleýden bas tartyp, kásipkerge qol jumsaǵan. Qazir ol aýrýhanada jatyr.
«Oqiǵa 24 qyrkúiekten 25 qyrkúiekke qaraǵan túni boldy. Sol kúni adam kóp bolǵan joq. Ózim bárin monitordan qarap, qaýpsizdikti baqylap otyramyn. Kelýshilerdiń biri aqy tólemeimin dep eseptesýden bas tartty. Ózderin salyq organynanmyz dep tanystyrdy. Ishke kirip, kameradan qarasam bireýi esik aldynda dáret syndyryp tur. Qoǵamdyq orynda bul qylyqtary uiat emes pe? Eskertý jasaǵanda balaǵat sózder aitylyp, urys boldy. Sóitip turǵanda ekinshisi oqys kelip, judyryǵymen bir urdy. Eseńgirip qaldym. Olar kólikke minip ketip qalǵan, biz politsiia shaqyrdyq. Urysqan kezde ózderine arnap ústel jaiý kerek ekenin aitty. Kelesi kúni úige, aýrýhanana kelip keshirim surady», - dedi kásipker Shynar Qamieva.
Qobda aýdandyq memlekettik kirister bóliminiń basshysy Bolat Jekeevtiń aitýynsha, kúdikti bolǵan T.Ámirǵaliev pen D. Báimen sol kúni on jylǵa jýyq ýaqyt jumys istegen qyzmetterinen óz erikterimen shyǵyp ketken.
«24 qyrkúiek kúni Qobda aýdanynyń ortalyǵynda dámhana meńgerýshisi men turǵynnyń arasy kelispeýshilik boldy. Turǵyn dámhana ákimshisin bir ret betinen urǵan. Qazir osy derek boiynsha Qylmystyq kodekstiń 293-baby, iaǵni, buzaqylyq boiynsha tergeý júrip jatyr», - dedi oblystyq PD baspasóz qyzmetiniń jetekshisi Erbolat Sarqulov.
