M.Mámetova atyndaǵy joǵary meditsinalyq kolledj aýlasyna batyrdyń eskertkish-biýsti ornytaldy, dep habarlaidy "Ult aqparat".
Keńes Odaǵynyń Batyry esimimen atalatyn oqý ordada Uly Jeńistiń 75 jyldyǵyna orai Mánshúk Mámetovanyń qurmetine biýst ashyldy. Sharaǵa Aqtóbe oblysynyń ákimi Ońdasyn Orazalin, kolledj ardagerleri, ustazdar qatysty. Oblys ákimi aqtóbelikterdi tarihi sátpen quttyqtady.
«Batyr apamyzdyń esimimen atalatyn kieli shańyraq, kolledj ujymyn 85 jyldyq mereitoimen shyn júrekten quttyqtaimyn! Tarihyn tereńnen tartqan bul ujym búgingi kúni jańa zaman talabyna sai joǵary qarqynmen damyp keledi. Elimizge sapaly meditsina kadrlaryn daiyndaýdyń ulaǵatty ustahanasyna ainalǵan Aqtóbe joǵary meditsinalyq kolledji bai tarihymen, mol tájiribesimen, abyroiǵa ie bolyp otyr.
Oblysymyzdyń kásibi bilim berý salasyna qosyp otyrǵan úlesi zor», - dep atap ótti Ońdasyn Orazalin.
Sondai-aq, Almaty qalasynan Mánshúk Mámetovanyń apasy Sholpan Mámetova, Reseidiń Pskov oblysy Nevelskii aýdany dene shynyqtyrý jáne sport basqarmasynyń bastyǵy Elena Voronkova beinequttyqtaýlaryn jetkizdi.
Aityp óteiik, 85 jyl tarihy bar oqý orny búgingi kúnge deiin 20 myńnan astam maman daiyndaǵan.
Respýblika boiynsha 82 kolledjdiń arasynan birinshi bolyp kórý múmkindigi shekteýli jandar úshin «Meiirbike isi», «Ýqalaýshy» biliktiligi jáne sóileý múmkindiligi shekteýli jandar úshin «Ortopediialyq stomatologiia», «Tis tehnigi» mamandyqtary boiynsha stýdentterdi oqytyp jatyr.
