"Qurban ait meiramy kezinde aqtóbelikterdiń qaýipsizdigine basa mán beriledi. Qalalyq ákimdiktegi derekózder Azattyq portalyna osylai habarlapty", - dep jazady "Ult aqparat".
Aty-jónin atamaǵan derekkózi búgin Aqtóbe qalasynyń ákimi Nurlan Ispanov politsiia, basqa da jaýapty sala ókilderimen birge oblys ortalyǵyndaǵy meshitterdi aralap shyqqanyn aitty. Qazaqstan musylmandary dini basqarmasynyń Aqtóbe oblysyndaǵy ókil imamy Tólebi Ospanov qala basshylyǵynyń "Nurǵasyr" meshitine kelip ketkenin rastady.
- Arnaiy jumys toby «Nurǵasyr» meshitine tańǵy saǵat 9-dar shamasynda keldi. Qurban shalynatyn jer men kólik turaǵyn aralap kórdi. Merekege ulttyq reńk berý jaǵy tiianaqtaldy. Biyl «Nurǵasyr» meshitiniń janyna 8, qalalyq meshittiń janyna 2 kiiz úi tigiledi. Aqtóbede buryn sońdy dini mereke kezinde osynsha kiiz úi tigilgen emes. Ulttyq oiyndar jarysyn ótkizýdi josparlap otyrmyz. Al qaýipsizdik máselesi kúshtik qurylymdar baqylaýynda - deidi imam Tólebi Ospanov.
Qurban ait - musylmandardyń oraza ait aiaqtalǵan soń 70 kúnnen keiin keletin dini merekesi. Biyl oraza aiy qarsańynda - 5 maýsym kúni Aqtóbede 26 adam eki qarý-jaraq dúkenine shabýyldap, ulttyq gvardiianyń áskeri bólimin basyp alýǵa tyrysqan. Shabýyl men atystan resmi málimet boiynsha 7 adam qaza taýyp, 40 shaqty adam jaralanǵan. Alty kúnge sozylǵan arnaiy operatsiiada shabýylǵa kúdikti delingen 18 adamnyń kózi joiylyp, birneshe adam ustalǵan.
Qazaqstan prezidenti Nursultan Nazarbaev Aqtóbede shabýyl jasaǵandardyń "radikaldyq dini top ókilderi" bolǵanyn jáne olardyń "shetelden nusqaý alǵanyn" málimdegen.
Ulttyq qaýipsizdik komiteti Aqtóbedegi shabýyldan keiin – 12-30 tamyz aralyǵynda Batys Qazaqstan jáne Aqtóbe oblystarynda radikaldyq úsh toptyń sezikti 21 ókili ustalǵanyn habarlaǵan.
