Aqtóbede áleýmettik jaǵynan osal toptaǵy otbasylardyń balalaryn qashyqtan oqytý úshin qosymsha 3 myń noýtbýk satyp alynady. Oǵan biýdjetten 480 million teńge qarjy bólindi, dep habarlaidy "Ult aqparat".
Eldegi tótenshe jaǵdaiǵa bailanysty Aqtóbe oblystyq máslihattyń kezekten tys sessiiasy ótti. Onda 2020-2022 jyldarǵa arnalǵan oblystyq biýdjetke ózgertýler men tolyqtyrýlar engizildi. Oblystyq ekonomika jáne biýdjetti josparlaý basqarmasynyń basshysy Gúlkasima Súiintaevanyń aitýynsha, Jumyspen qamtýdyń jol kartasyn qarjylandyrý úshin respýblikalyq biýdjetten 33,4 mlrd teńge bólindi. Qarjy áleýmettik nysan, turǵyn úi qurylysy men jol jóndeýge qarastyrylǵan. Sonymen qatar az qamtylǵan otbasyn qoldaýǵa 727,7 mln teńge bólindi. Bul 36 myńnan astam otbasyǵa 20 myń teńgeden qosymsha kómek berýge baǵyttalǵan jumys.
«Azyq-túlik jáne kúndelikti qajetti taýardy úzdiksiz qamtamasyz etý úshin aimalymǵa 500 mln teńge bólindi. Áleýmettik jaǵynan osal sanattaǵy balalardy qashyqtan oqytýdy uiymdastyrý úshin 480 mln teńge bólip, 3 myń noýtbýk satyp alý qajet. Sonymen qatar koronavirýs infektsiiasymen kúresý úshin meditsinalyq jabdyqtardy satyp alýǵa 529 mln teńge bólý josparlanyp otyr», - dedi Gúlkasima Súiintaeva.
Aita keteiik, oblys boiynsha 402 mektep bar. Óńirde 151 myńǵa jýyq oqýshy bolsa, onyń 130 myńy óz kúshimen planshet, kompiýter qoldana alady. Oblystyq bilim basqarmasy baspasóz qyzmetiniń habarlaýynsha, sabaq ótetin mektep tizimi qazir naqtylanyp jatyr.
