Órt kezinde gaz quiý beketi aýmaǵynda 2 qyzmetker bolǵan. Sondai-aq, kýágerlerdiń aitýynsha, órtengen tsisterna bos bolǵan, dep habarlaidy QazAqparat Tótenshe jaǵdailar ministrligi ónerkásiptik qaýipsizdik komitetiniń baspasóz qyzmetine silteme jasap.
«17 shilde jergilikti ýaqytpen saǵat 19:02-de Aqtóbe oblysy Alǵa aýdanynyń tótenshe jaǵdailar bóliminiń «101» jelisine «Limangaz» JShS avtogaz quiý stantsiiasyndaǵy órt týraly habar tústi. Órtti Aqtóbe oblysy Alǵa aýdandyq órt sóndirý qyzmeti sóndirdi», - delingen resmi aqparatta.
Habarlamada aitylǵandai, órt saldarynan qaza tapqandar men zardap shekkender joq.
«Aldyn ala aqparat boiynsha, gaz quiý beketi kúndizgi saǵat 12-den bastap jumys istemegen. Beket aýmaǵynda 2 qyzmetker bolǵan. Kýágerlerdiń aitýynsha, órtengen tsisterna bos bolǵan», - deidi vedomstvodan.
Búginde Alǵa aýdanynyń tótenshe jaǵdailar bólimi órt sebebin anyqtaý úshin tehnikalyq saraptama taǵaiyndady.
Sondai-aq, ónerkásiptik qaýipsizdik komiteti bolǵan jaittyń mán-jaiyn anyqtaýǵa qatysty komissiia qurylatynyn jáne oqiǵa ornyna memlekettik inspektordyń jiberilgenin habarlap otyr.
«Tolyq aqparat tergeý júrgizilip, órttiń búkil mán-jaiy anyqtalǵannan keiin usynylady», - degen túsinik berildi komitetten.
Eske salsaq, buǵan deiin Aqtóbe oblysy Alǵa aýdanyndaǵy gaz quiý beketinde tsisterna jarylyp, kólik pen ákimshilik ǵimarattyń janyp ketkenin habarlaǵan edik.
