Aqtóbede oblys ákimdiginiń bastamasymen ERG S.a.r.l. quramyna kiretin kásiporyndardyń satyp alý protsedýrasynyń qatysýshylary men áleýetti jetkizýshileri úshin ERG kompaniiasynyń ashyq esik kúnderi ótti.
Sharanyń basty maqsaty – memleket basshysynyń iri kásiporyndardy shaǵyn jáne orta biznes sýbektilerimen biriktirý sharalaryn qabyldaý týraly tapsyrmasyna sáikes ERG kompaniiasynyń satyp alý rásimine qol jetkizýdi keńeitý.
Kezdesýge shaǵyn jáne orta biznes mártebesi bar otyzdan asa aqtóbelik túrli kompaniialar qatysty. Atap aitqanda, kórmede arnaiy kiimder tigetin, bekitpe buiymdaryn, órtke qarsy jabdyqtardy, polietilen qubyrlaryn, filtratsiialaityn elementterdi, sorǵylaý jáne jeldetkish qural-jabdyqtaryn, qaǵaz ónimderin, azyq-túlik shyǵaratyn kásiporyndar, taǵamdanýdy uiymdastyrý uiymdarynyń qyzmetin kórsetetin kompaniialar jáne t.b. óz ónimderin usyndy.
Oblys ákimi Berdibek Saparbaev pen «Eýraziialyq toptar» menedjerleri keńesiniń tóraǵasy Aleksandr Mashkevich, «Atameken» ÓKP ókilderi qatysqan dóńgelek ústel kezinde taraptar ERG-diń aqtóbelik shaǵyn jáne orta biznespen seriktestiginiń ózekti suraqtaryn talqylady.
Oblys ákimi shaǵyn jáne orta kásipkerlikti damytý memlekettiń strategiialyq mindeti bolyp tabylatynyn atap ótti.
- Prezident Nursultan Ábishuly 2050 jylǵa qarai shaǵyn jáne orta biznestiń el ekonomiksyndaǵy úlesin 50 paiyzǵa deiin kóbeitý mindetin qoidy. Búginde Aqtóbe oblysynyń ekonomikadaǵy shaǵyn jáne orta biznesiniń úlesi 32 paiyzdy quraidy. Osyndai kezdesýlerdiń, memlekettik qoldaý sharalarynyń arqasynda bul kórsetkish jyl saiyn ósip keledi. Biz kásipkerlikti damytý úshin qolaily jaǵdai jasaýǵa tyrysamyz. Sondai-aq, «Qazhrom» 25 jyldyń ishinde oblys ekonomikasyna shamamen jarty trillion teńge investitsiialaǵanyn aitqym keledi. Osy jylǵa 70 milliardtai teńge josparlanǵan. ERG basshylyǵyna bastamalardy qoldap, óz óndirisin toqtaýsyz jetildirip otyrǵany úshin alǵys aitamyz, - dep atap ótti Berdibek Saparbaev.
Óz kezeginde A. Mashkevich óńirdegi biznes ahýalǵa joǵary baǵa berip, jergilikti taýaróndirýshilermen seriktestik etýge qyzyǵýshylyq tanytatynyn rastady.
- Biz jergilikti kásipkerlikpen kóptegen sebepter boiynsha - patriottyq jáne ekonomikalyq turǵydan jáne turaqtylyq turǵysynan birge jumys isteýge umtylamyz. Sandar ózderi úshin sóileidi. Máselen, byltyr, «Qazhromnyń» ózi otandyq óndirýshilerden 19 mlrd teńgege, Aqtóbe oblysy boiynsha 4 mlrd teńgege taýar satyp alǵan. Aqtóbe oblysynyń osynda shaǵyn jáne orta biznes jumysy úshin qolaily jaǵdai qurýǵa eń belsendi óńirlerdiń biri ekenin aitqym keledi. Sol úshin oblys basshylyǵyna úlken rahmet, - dedi Aleksandr Mashkevich.
Qosa keteiik, ERG «Qazhrom» TUK» AQ (Dóń taý-ken baiytý kombinaty, AZF, Aqsý ferroqorytpa zaýyty), «Sokolov-Sarybai ken baiytý óndiristik birlestigi», «Qazaqstan alliýminii» AQ syndy qala túzýshi kásiporyndardyń basyn biriktiredi.
