Aqtóbede eńbekaqy respýblikalyq kórsetkishten tómen. Qazaqstannyń batys aimaǵy boiynsha da eń azy - Aqtóbede. Bul týraly oblys ákimi Ońdasyn Orazalin esep berý kezdesýinde aitty, dep habarlaidy "Ult aqparat".
«Batys Qazaqstan aimaqtary boiynsha jalaqy eń tómen jalaqy Aqtóbede. Osy baǵytta kásiporyn basshylarymen kezdesý ótkizip, jumys atqaryldy. Nátijesinde munai-gaz, ken óndirý, qyzmet kórsetý salasynda ósim baiqalady. 2019 jyly oblystyń 1400-den astam kásiporyn qyzmetkerleriniń eńbekaqysyn orta eseppen 15 paiyzǵa arttyrdy. Jumys jalǵasady. «SNPS-Aqtóbemunaigaz», «QazHrom» TUK» AQ men servistik kompaniialar arasyndaǵy jalaqy ósirý jumysy jalǵasyn tabady», - dedi oblys ákimi Ońdasyn Orazalin.
Aita keteiik, Aqtóbede ótken jyly ortasha jalaqy 153 myń teńgege jetti. Ótken jyly jeltoqsanda 33 myńǵa jýyq aqtóbelik jalpy somasy 2,6 mlrd teńgege syiaqy aldy.
«Ádette eń tómengi jalaqyny aýyl sharýashylyǵy salasyndaǵy jumysshylar alady. Mal baǵatyndardyń tabysy az. Sol sebepti qoishy, baqtashy tapshy. Únemi habarlandyrý beredi. Eshkim barǵysy kelmeidi. Keide 50-60 myń teńgeniń ózin sharýa qojalyqtary durys tólemeidi. Ómirde kezdesetin jait. Kimge ziian? Aldymen sharýa qojalyǵy zardap shegedi. Durys eńbekaqy tólenbese urlyq-qarlyq bolady, mal it-qusqa jem bolady. Sonymen qatar, osy máseleni sheshýdiń jolyn tapqandar bar. Máselen, hromtaýlyq kásipker Serik Orazymbetov jumysshylaryn turǵyn úimen qamtamasyz etken, jalaqysy joǵary. Arasynda jumysshylaryn qul sekildi jumsap, aqsha tólemeitinder de kezdesedi», - dedi Ońdasyn Orazalin.
