Aqtóbe soty 21 jeltoqsan kúni oblystyq ishki ister departamenti (IID) basshysynyń burynǵy orynbasary Rahat Ahanovty eki ai merzimge qamaýǵa alýǵa sanktsiia berdi. Sýdia Zinaida Shmirovanyń aitýynsha, Rahat Ahanov politsiiada laýazymdy qyzmet atqara júre "munai urlyǵymen ainalysqan uiymdasqan qylmystyq topqa qoldaý kórsetken". Tergeý oǵan Qylmystyq kodekstiń 197-baby 4-bóliminiń 1-pýnkti men 262-baby 3-bólimi boiynsha aiyp taǵyp otyr.
Memlekettik aiyptaýshy Aibek Shoqparovtyń sózine qaraǵanda, 2014-2016 jyldar aralyǵynda Rahat Ahanov "politsiiada basshylyq qyzmet atqara júre zańsyz munai ainalymynan kóldeneń tabys tapqan". Kúdikti ózine taǵylǵan aiyppen múldem kelispeidi.
Rahat Ahanov 2015 jylǵy maýsym aiyna deiin bes jyl boiy Aqtóbe oblystyq IID basshysynyń birinshi orynbasary bolǵan.
- Ishki ister ministrligi maǵan osy máselemen ainalysý úshin bir ai merzim berdi. Mereke ótken soń Astanadan Aqtóbege kelip, tergeýge qoldaý kórsetpek bolyp júrgenmin. Tergeýge kedergi keltireiin degen oiym bolǵan emes. Otbasyly adammyn. Naýqas anam bar. Óz densaýlyǵym da nashar. Sol qolym uiyp qala beredi. Ári pogon taǵyp júrgen adammyn. Maǵan senýge bolady. Meni izoliatorǵa qamamai, úiqamaqqa alýlaryńyzdy suraimyn, - dedi Rahat Ahanov sot aldynda sóilegen sózinde.
Rahat Ahanov 19 jeltoqsan kúni Astanada ustalǵan. Kúdikti men onyń advokatynyń ótinishine qaramastan sot ony eki aiǵa qamaý týraly sheshim qabyldady.
Aqtóbe oblysy men Qazaqstannyń keibir aimaǵynda 7 jeltoqsan kúni júrgizilgen arnaiy operatsiia barysynda munai jáne munai ónimderin urlaýmen jáne zańsyz tasymaldaýmen ainalysqan degen kúdikpen birneshe adam ustalǵan bolatyn. Tergeý laýazymdy politsei Rahat Ahanov osy topqa qoldaý kórsetken dep sanaidy.
UQK jeltoqsannyń 7-si kúni komitet qyzmetkerleri men korrýptsiiaǵa qarsy is-qimyl ulttyq biýrosy jáne ishki ister ministrligi birlesip Aqtóbe jáne taǵy kei aimaqta "munai ónimderin jymqyrýmen ainalysqan" degen kúdikke ilingen toptyń jolyn kesý operatsiiasyn júrgizgenin habarlaǵan. Arnaiy qyzmet qansha adam ustalǵany, tutqyndaý qai jerde bolǵany týraly naqty aqparat bermedi. Operatsiia barysynda kúdiktilerden ózge munai men munai ónimderi bar avtotsisternalar da tárkilengen.
UQK sonymen qatar "munai urlaýmen ainalysqandardy qorǵashtaǵan radikaldy salafizm baǵytyn ustanatyn qylmystyq toptyń birneshe múshesi ustalǵany" týraly da habarlaǵan.
