Aqtóbe oblysy, Qarǵaly aýdany, Qosestek aýylynyń turǵyndary bir aptadan beri qorasyndaǵy jem-shóbin kúzetip júr. Sebebi belgisiz bireýler hat jazyp, «kezek sende» dep eskertip, shóbin órtep ketedi, dep habarlaidy QazAqparat tilshisi.
Aqtóbe oblysy, Qarǵaly aýdany, Qosestek aýylyndaǵy túsiniksiz jaǵdai el nazaryn aýdardy. Aýyl halqy úreilenip, óz kezegin kútip júr. Qorasy men jem-shóbi bar turǵyndar kezekshilik qoiyp, aýlaǵa it bailady. Biraq nátije az. Sebebi, belgisiz bireý «kezek sende» dep úshbý hat tastap ketti.
«Hatta «Rýslan, búgin seniń jolyń boldy. Biraq kelesi kezek sende. Qorasynda shóbi bar adamnyń bári 50 myń teńge daiyndasyn. Karta nómirin habarlaimyz» degen jazý bar. Bul hatty politsiia alyp ketti. Sodan beri uiqy joq, kúzet kúsheidi», - dedi aýyl turǵyny Naziia Jumabaeva.
Qazirgi kezde aýylda 7 úidiń shóbi kúlge ainaldy. Kúnde bir úiden órt shyǵyp, turǵyndar óz kúshimen sóndirip álek. Aýyl turǵyndarynyń shyǵyny 200-800 myń teńgege jetken.
«Shóptiń bári janyp ketti. Shóp bolmaǵan soń maldy soiýǵa týra keldi. Qys keldi, olardy qalai baǵamyn?» - dedi taǵy bir aýyl turǵyny Taǵybergen Báimenov.
Qazirgi kezde aýdan ákimdigi mán-jaidy anyqtaý úshin arnaiy komissiia jiberdi.
«Aýdandyq politsiia bólimine habar berip, qylmystyq is qozǵaldy. Halyq ákimdikke aryz jazyp, kómek suramady. Biraq ákimdik shóbi men qorasy órtengen úidi baqylaýǵa aldy. Olarǵa jumyspen qamtý ortalyǵy janynan materialdyq kómek beriledi. Komissiia sheshimi aldaǵy ýaqytta belgili bolady. Aýylda politsiia jumys istep jatyr», - Qarǵaly aýdandyq ishki saiasat bóliminiń basshysy Erjan Esenbaev.
Aita keteiik, aýylda 700 úi bar. Aýyl ákimi Gúljan Dosmaǵambetovanyń aitýynsha, shóbi órtenip, mal azyǵyn taba almai otyrǵan turǵyndarǵa «Qosestekagro» sharýashylyǵy kómektesip, ótken jyldardan qalǵan shópti bermek. Al aýylǵa 14 qarashadan beri úzdiksiz kúzet qoiyldy.
