Aqtóbe oblysynda eki kúnnen beri avtogaz tapshy. Qalada suiytylǵan gaz satatyn beketterdiń basym kópshiliginde "gaz joq" dep jazylǵan taqtaisha ilýli tur. Avtogaz satyp jatqan bireń-sarań beketten uzyn-sonar kólik kezegin baiqaýǵa bolady, dep habarlaidy Azattyq radiosy.
"Esh jerde gaz joq, kei jerlerde talonmen berip jatyr" deidi gaz kezeginde turǵan aqtóbelik Janar Kliýmova. Ózin Aibek dep tanystyrǵan turǵyn suiytylǵan gaz izdep, birneshe beketti aralap shyqqanyn aitady.
Aqtóbe oblysyndaǵy suiytylǵan gaz tasymaldaýshylar qaýymdastyǵynyń tóraiymy Altynai Muqanova oblys aýmaǵyndaǵy beketterdiń 20-30 paiyzynda ǵana avtogaz bar ekenin aitady. Muqanova avtogaz tapshylyǵyn shildede Aqtóbe oblysyna áleýmettik gazdyń az bólinýimen bailanystyryp otyr.
"Ai saiynǵy norma 12 500 tonna bolatyn, shilde aiynda nebári 10 000 tonna gaz bólindi" deidi Altynai Muqanova.
Al oblys ákimdigi bolsa, gaz tapshylyǵyna gaz óndirý zaýyttaryndaǵy jóndeý jumystary sebep deidi. Jergilikti bilik "jaǵdai búgin-erteń rettelýi kerek, tamyz-qyrkúiek ailarynda aimaqta avtogaz tapshylyǵy bolmaidy" dep ýáde berip otyr.
"Qazaqstan ishki naryǵyna suiytylǵan munai gaz jetkizý jónindegi komissiia otyrysynyń hattamasyna sáikes gaz óndirý zaýyttarynda jóndeý jumystarynyń júrgiziletini aldyn ala habarlandy. Gaz tapshylyǵy osydan týyndap otyr. Jaz kezinde memlekettik shekara arqyly ótetin avtokólik aǵyny ulǵaiyp, egistik basyndaǵy jumystar da kóbeiedi. Sondyqtan Qazaqstan energetika ministrliginen shilde aiy úshin qosymsha myń tonna gaz suradyq" dep habarlady ákimdik.
Resmi málimetke qaraǵanda, Aqtóbe oblysynda 171 847 avtokólik tirkelgen. Onyń otyz paiyzǵa jýyǵy suiytylǵan gazben júredi.
Qazaqstandaǵy gazdyń basym bóligi óndiriletin batys aimaqta halyqtyń kóbi kólikterine arzan dep suiytylǵan gaz paidalanady. Biyl qańtarda batystaǵy Jańaózen qalasynda jurt suiytylǵan gaz baǵasynyń qymbattaýyna qarsy shyǵyp, bul narazylyqty eldiń basqa aimaqtary da qoldaǵan edi. Qańtarda eldegi suiytylǵan gaz baǵasynyń qymbattaýyna qarsy beibit narazylyq sońy keiin qantógiske ulasyp, kemi 238 adam qaza bolǵan. Sarapshylar men bilik suiytylǵan gaz baǵasynyń qymbattaýyna qarsylyq pen 5 qańtardan keiingi tártipsizdikti eki bólip qarastyrady.
Jańagúl JÚRSIN
